महाराष्ट्र न्यूज वन प्रतिनिधी, कोल्हापूर : येथील कोल्हापूर अभियांत्रिकी (प्रदत्त स्वायत्त) महाविद्यालयाच्या माजी विद्यार्थ्यांचा स्नेहमेळावा नुकताच  झाला. या कार्यक्रमासाठी देशातून परदेशातून सुमारे ४५० हून अधिक माजी विद्यार्थी विद्यार्थिनी प्रत्यक्षात उपस्थित होते. याप्रसंगी विद्यार्थ्यांनी त्यांच्या त्यांच्या विभागांना भेटी देऊन बदलत्या विभागाच्या स्वरूपाची माहिती करून घेतली. केआयटीच्या स्टार्टअप उपक्रमांची सुद्धा त्यांनी माहिती घेतली. आयडिया लॅबला भेट दिली.

या स्नेहमेळाव्यात संस्थेतील निवृत्त प्राध्यापकांचा सत्कार करण्यात आला. स्थापत्य अभियांत्रिकीच्या १९९४-९५ च्या बॅचच्या वतीने त्यांचे वर्गमित्र असणारे व दुर्दैवाने सध्या हयात नसलेले माजी विद्यार्थी सचिन महाजनी,अजित जुवेकर यांच्या नावे या वर्षीपासून स्थापत्य अभियांत्रिकीतील द्वितीय, तृतीय व अंतिम वर्षातील विद्यार्थ्यांना बेस्ट परफॉर्मन्स अवॉर्डने सन्मानित करण्यात येणार असल्याची घोषणा यावेळी करण्यात आली.

मुख्य कार्यक्रमात संस्थेचे संचालक डॉ. मोहन वनरोट्टी यांनी केआयटीच्या सध्याच्या प्रगतीची माहिती उपस्थितांना करून दिली. केआयटीचे माजी विद्यार्थी व सध्या संस्थेचे अध्यक्ष असलेले साजिद हुदली यांनी माजी विद्यार्थी संघाच्या उद्देश व कार्यप्रणालीची माहिती दिली. “ माजी विद्यार्थी म्हणून आपण आपल्या महाविद्यालयाच्या विकासात एक मार्गदर्शक म्हणून  मोठे योगदान देऊ शकता. स्वतःच्याही विकासामध्ये हा विद्यार्थी संघ आपल्याला नक्कीच फलदायी ठरेल.” त्यानंतर विविध विभागातील माजी विद्यार्थ्यांनी आपल्या भूतकाळातील आठवणींना उजाळा देत कॉलेजच्या बदलत्या स्वरूपा बद्दल समाधान व्यक्त केले. 

केआयटीचे सचिव दीपक चौगुले, विश्वस्त सुनील कुलकर्णी, कोल्हापूर इन्स्टिट्यूट ऑफ टेक्नॉलॉजी ॲल्युमिनाई असोसिएशनचे सचिन पाटील, विद्यानंद बेडेकर, प्रसाद गुळवणी, प्रकाश सोमय्या उपस्थित होते. प्रा. जहीदा खान व प्रा.श्रुती काशिद यांनी सूत्रसंचालन केले. अधिष्ठाता, माजी विद्यार्थी संघ डॉ. सुनील कारीदकर यांनी आभार मानले. देशातून तसेच परदेशातून सुमारे १५०० माजी विद्यार्थ्यांनी यु.ट्यूब लाईव्ह च्या माध्यमातून या कार्यक्रमास उपस्थिती लावली.