महाराष्ट्र न्यूज वन प्रतिनिधी, कोल्हापूर : कोल्हापूर महापालिकेच्या गांधीनगरपर्यंतच्या हद्दीतील जागा महानगरपालिकेचीच असल्याचा निर्वाळा सर्वोच्च न्यायालयाने बुधवारी दिल्यानंतर महापालिका प्रशासनाने तत्काळ हालचाली सुरू केल्या आहेत. आयुक्त डॉ.राजेंद्र भारुड यांनी संबंधित अधिकाऱ्यांची बैठक घेऊन या जागेवरील सर्व बांधकामांची पुनर्तपासणी करण्याचे आदेश दिले. याबाबत निवडणूक कार्यालयात बैठक पार पडली. 

 बैठकीस अतिरिक्त आयुक्त शिल्पा दरेकर, उप-शहर रचनाकार एन. एस. पाटील तसेच अभियंता व सर्व्हेअर उपस्थित होते. बैठकीत शुक्रवार २४ एप्रिल २०२६ पासून गांधीनगर पर्यंतच्या महापालिकेच्या हद्दीतील उचगांव महसूली गावांतील सर्व्हेनंबरातील सर्व बांधकामांची सखोल तपासणी करण्याचे निश्चित करण्यात आले.  तपासणी सकाळी साडे दहा  वाजल्यापासून सुरू करण्यात येणार असून यासाठी पाच पथकांची नियुक्ती करण्यात आली आहे. या पथकांमध्ये नगररचना विभाग, विभागीय कार्यालय क्रमांक चार, घरफाळा विभाग तसेच परवाना विभागातील कर्मचारी सहभागी राहणार आहेत. या मोहिमेत संबंधित जागेवरील सर्व इमारतींची मोजमापे करून बांधकामांची पडताळणी केली जाणार आहे. तसेच घरफाळा व परवाना विभागामार्फत आवश्यक नोंदींची छाननीही करण्यात येणार आहे.