महाराष्ट्र न्यूज वन प्रतिनिधी, कोल्हापूर : कोल्हापुरातील जिल्हा परिवीक्षा व अनुरक्षण संघटना बालकल्याण संकुल संचलित कै. अहिल्याबाई शं. दाभोळकर महिला आधारगृह विभागातील मुलगी पूजा व भुदरगड तालुक्यातील खानापूर येथील विश्चजीत विजय पुजारी यांचा विवाह सोहळा मंगळवारी, (सोळा डिसेंबर २०२५) होत आहे. बालकल्याण संकुल संस्थेच्या प्रांगणात सायंकाळी पाच वाजता हा विवाह सोहळा होत आहे. बालकल्याण संस्थेने आजपर्यंत ७४ अनाथ, निराधार मुलींचे विवाहाद्वारे पुनर्वसन केले आहे. बालकल्याण संस्थेतील हा ७५ विवाह सोहळा आहे. अशी माहिती बालकल्याण संकुलचे मानद कार्यवाह पद्मजा तिवले व मानद सहकार्यवाह एस. एन. पाटील यांनी दिली.

 या विवाह सोहळयातील बालकल्याण संकुलतील कन्या पूजाचे पालकत्व लोकमतचे उपवृत्त संपादक विश्वास पाटील व सातारा जिल्हा - महिला बालविकास अधिकारी शिल्पा पाटील हे दांपत्य करणार आहे. पूजा ही लहानपणापासूनच बालकल्याण संस्थेत वाढली आहे. तिने दहावीनंतर हॉटेल मॅनेजमेंट कोर्स गोखले कॉलेज येथे पूर्ण केला. सध्या ती बीए कला शाखेत द्वितीय वर्षात शिकत आहे.तर विश्वजीत पुजारी हे भुदरगड तालुक्यातील खानापूर येथील आहेत. त्याने दहावीनंतर औद्योगिक प्रशिक्षण केंद्र भुदरगड येथे व्यवसायभिमुख प्रशिक्षण पूर्ण केले. तो सध्या राज्य परिवहन महामंडळ राधानगरी आगार येथे सहायक मेकॅनिक म्हणून सेवेत आहे.

दरम्यान पूजा व विश्वजीत यांचा साखरपुडा समारंभ पंधरा डिसेंबर रोजी उज्ज्वला शरद गोंजारे व एस. एस. गोंजारे यांच्या हस्ते झाला. या विवाह सोहळयाची मुहूर्तमेढ व हळदी समारंभ, रविवारी १४ डिसेंबर रोजी सकाळी दहा वाजता आहे. मुहूर्तमेढ कार्यक्रमासाठी प्रमुख पाहुणे म्हणून शिरोळ पोलिस ठाण्याचे पोलिस हवालदार प्रदीप कृष्णा कुंभार व पूनम प्रदीप कुंभार हे लाभले आहेत. तर मंगळवारी, सोळा डिसेंबर रोजी विवाह सोहळा आहे. बालकल्याण संकुलमधील पूजा हिचे पालकत्व पत्रकार विश्वास पाटील व जिल्हा - महिला बालविकास अधिकारी शिल्पा पाटील हे करणार आहेत. संस्थेतील या अमृत महोत्सवी सोहळयास उपस्थित राहावे असे आवाहन संस्थेने केले आहे.   या विवाह सोहळयासाठी संस्थेचे अध्यक्ष व जिल्हाधिकारी अमोल येडगे, उपाध्यक्ष व पुढारीचे संपादक प्रतापसिंह जाधव, व्ही. बी. पाटील, कार्याध्यक्ष योगेश कुमार, मानद खजिनदार निरंजन वायचळ, महिला आधारगृह अधीक्षक नजिरा नदाफ, जिल्हा महिला व बालविकास अधिकारी सुहास वाईंगडे यांच्यासह समाजातील विविध क्षेत्रातील मान्यवर, संस्थेचे देणगीदार उपस्थित राहणार आहेत.