महाराष्ट्र न्यूज वन प्रतिनिधी, कोल्हापूर : कोल्हापुरात फुटबॉलची मोठी क्रेझ. प्रत्यक्ष सामन्यावेळी गोल करणाऱ्या खेळाडूंना फुटबॉल शौकिन वैयक्तिक बक्षीस जाहीर करतात. आवडत्या संघाने सामना जिंकला, स्पर्धेचे विजेतेपद पटकाविले तर बक्षीसांची खैरात ठरलेली. वेताळमाळ तालीम मंडळाने सतेज चषक फुटबॉल स्पर्धा जिंकली. या खेळाडूंचा गौरव करण्यासाठी संघातील पंधरा खेळाडूंना चक्क अॅक्टिव्हा भेट स्वरुपात देण्यात येणार आहेत. सत्यम सागर कोराने यांनी ११ खेळाडूंना प्रत्येकी एक अशा अकरा अॅक्टिव्हा तर राजेंद्र बाबूराव साळोखे यांनी चार खेळाडूंना प्रत्येकी एक अशा चार अॅक्टिव्हा देणार आहेत. एकूण १५ दुचाकी पंधरा खेळाडूंना प्रदान करत त्यांचा अनोखा सत्कार होणार आहे. सोमवारी, ११ मे २०२६ रोजी सायंकाळी सहा वाजता छत्रपती शाहू स्टेडियम येथे हा बक्षीस समारंभ होणार आहे.