महाराष्ट्र न्यूज वन प्रतिनिधी, कोल्हापूर : पुण्यश्लोक अहिल्यादेवी होळकर यांच्या २९८ व्या जयंतीनिमित्त रविवारी (चार जून २०२३ ) कोल्हापूर शहरातून मिरवणूक काढण्यात येणार आहे अशी माहिती मल्हार सेनेचे बबनराव रानगे यांनी पत्रकार परिषदेत दिली.

महाराष्ट्र राज्य धनगर समाज महासंघ प्रणित मल्हार सेना व युवक संघटना यांच्या संयुक्त विद्यमाने विविध कार्यक्रम होत आहेत. मंगळवारी (ता.३० मे) सरकारी कार्यालयात अहिल्यादेवींच्या प्रतिमा लावल्या जाणार आहेत. बुधवारी (३१ मे) वाशी नाका येथील अहिल्यादेवी होळकर यांच्या स्मारकामध्ये जयंती सोहळा होणार आहे. तर रविवारी सायंकाळी पाच वाजता मिरजकर तिकटी येथून मिरवणुकीला प्रारंभ होईल.

मिरवणुकीत धनगरी ढोल, कैताळाचे २०० लोकांचे पथक, गजनृत्य, महिला लेझीम पथक, मर्दानी खेळ, हलगी वादक यांचा सहभाग असणार आहे. अहिल्यादेवींच्या जीवनावरील फलक व चित्ररथ मिरवणुकीत असतील. महिला व पुरुष पिवळे फेटे, पिवळे झेंडे घेऊन मिरवणुकीत सहभागी होतील. तर अकरा जूनला अकरा महिलांना सामाजिक कृतज्ञता पुरस्कार देण्यात येणार आहेत.

पत्रकार परिषदेला गोकुळचे संचालक बयाजी शेळके, राघू हजारे, छगन नांगरे, बाबूराव बोडके, दत्ता बोडके, शामराव माने, आनंदा धनगर, हेमंत बोडके, बबलू फाले आदी उपस्थित होते.