महाराष्ट्र न्यूज वन प्रतिनिधी, कोल्हापूर : कोल्हापूर शहर आणि परिसरात महापालिकेच्या मालकीच्या ठिकठिकाणी जागा आहेत. मात्र धक्कादायक प्रकार म्हणजे, या जागांची एकूण संख्या, जागाा किती यासंबंधीची माहितीच महापालिकेच्या इस्टेट विभागप्रमुखांना नाही. कोल्हापूर नेक्स्ट ंसंघटनेच्या शिष्टमंडळाने यासंबंधी अधिकाऱ्यावर प्रश्नांचा भडिमार केला, पण अधिकाऱ्यांना संयुक्तिक उत्तर देता आले नाही.

 या संघटनेच्या शिष्टमंडळाची, गुरुवारी महापालिकेच्या उपायुक्त साधना पाटील यांच्याशी शहरातील अतिक्रमणासंबंधी चर्चा झाली. कोल्हापूर शहरातील अतिक्रमण पंधरा दिवसात हटवावे, अन्यथा तीव्र आंदोलन केले जाईल असा इशारा संघटनेचे निमंत्रक चंद्रकांत चव्हाण यांनी दिला. बैठकीच्या प्रारंभी माजी नगरसेवक अजित ठाणेकर यांनी इस्टेट विभागाच्या प्रमुखांना शहरातील महानगरपालिकेच्या मोकळ्या जागांची संख्या  विचारली. त्यांना याचे संयुक्तिक उत्तर देता आले नाही. त्यामुळे बैठकीच्या सुरुवातीलाच कार्यकर्ते संतप्त झाले. 

अजित ठाणेकर यांनी वारंवार तक्रार करूनही वर्षानुवर्षे बेकायदेशीरपणे चालणाऱ्या विनापरवाना लॉजिंगमध्ये काही माजी नगरसेवक आणि आजी-माजी अधिकाऱ्यांचे आर्थिक संबंध गुंतल्याचा आरोप केला. उपायुक्तांनी सर्वच प्रकरणे गंभीर असून यात वैयक्तिक लक्ष घालू आणि लवकरात लवकर कोल्हापूर अतिक्रमण मुक्त करू अशी ग्वाही कार्यकर्ते नागरिकांना दिली. यावेळी इस्टेट व अतिक्रमण विभाग प्रमुख साळोखे, परवाना अधीक्षक राम काटकर, रवींद्र पोवार या अधिकाऱ्यांसह गणपत गायकवाड, वसंत रोकडे, सुरज धनवडे, ऋतुराज नढाळे उपस्थित होते.