महाराष्ट्र न्यूज वन प्रतिनिधी : जिल्ह्यातील कुपोषण निर्मूलनासाठी एक महत्त्वपूर्ण व अभिनव उपक्रम हाती घेण्याचा निर्णय झाला. सर्व जिल्हा परिषद सदस्य आपापल्या मतदारसंघातील कुपोषित बालकांना दत्तक घेऊन त्यांना कुपोषणमुक्त करण्यासाठी प्रयत्न करणार आहेत. महिला  व बालकल्याण समिती सभापती विद्या विलास पाटील यांच्या अध्यक्षतेखाली बैठक झाली.

 जिल्हा परिषद कोल्हापूर येथील स्वर्गीय वसंतराव नाईक समिती सभागृहात महिला व बाल कल्याण समितीची सभा सभापती विद्या विलास पाटील यांच्या अध्यक्षतेखाली पार पडली. या बैठकीत 'पुण्यश्लोक अहिल्यादेवी होळकर विभागीय पुरस्कार' पात्र ठरलेल्या 'स्वयंप्रेरिका ग्रामीण महिला संस्था' (पोर्ले तर्फे बोरगाव) आणि 'भगवानबाबा शिक्षण प्रसारक संस्था' (इचलकरंजी) या संस्थांचे अभिनंदन करण्यात आले.

सभापती पाटील यांनी अंगणवाड्यांच्या सद्यस्थितीचा सविस्तर आढावा घेतला. ज्या अंगणवाड्यांमध्ये सोलर पॅनेल नादुरुस्त आहेत, तेथे ग्रामपंचायतींच्या माध्यमातून तात्काळ वीज जोडणी (लाइट कनेक्शन) करण्याची सूचना केली. तसेच, बालकांच्या आरोग्याच्या अचूक नोंदीसाठी नादुरुस्त वजनकाटे बदलून नवीन काटे देणे आणि बंद असलेले डिजिटल लर्निंग टीव्ही बदलून नवीन टीव्ही उपलब्ध करून दयावेत. यासोबतच, करवीर पंचायत समिती येथे महिलांसाठी नवीन समुपदेशन केंद्र सुरू करण्यासाठी राज्य महिला आयोगाकडे शिफारस करण्याचा निर्णय घेण्यात आला.

बैठकी दरम्यान सदस्या  वर्षाराणी पाटील यांनी उपस्थितांना 'नशामुक्तीची शपथ' दिली. सदस्या सोनाली पाटील यांनी आभार मानले. या बैठकीस समिती सदस्या शैलजा पाटील, रोहिणी आबिटकर, संयोगिता मोरे,  विनिता भोगम, गडहिंग्लज पंचायत समिती सभापती प्रतिभा चव्हाण, जिल्हा कार्यक्रम अधिकारी नितीन मस्के, कक्ष अधिकारी संजय जाधव, अधीक्षक नारायण चांदेकर, विस्तार अधिकारी प्रशांत पाटील, सौरभ कांबळे  उपस्थित होते.