महाराष्ट्र न्यूज वन प्रतिनिधी, कोल्हापूर : कोल्हापुरातील खराब रस्ताप्रकरणी काँग्रेस पक्षातर्फे बुधवारी कोल्हापू शहरातील ८१ प्रभागात आंदोलन झाले. खराब रस्त्यावरुन काँग्रेसच्या पदाधिकाऱ्यांनी महायुती सरकारच्या विरोधात निदर्शने केली. तसेच महायुती सरकारचा धिक्कारही केला.  दरम्यान काँग्रेसच्या या आंदोलनावर भारतीय जनता पक्षाने टीकास्त्र सोडले आहे. काँग्रेसचे जिल्हाध्यक्ष आमदार सतेज पाटील यांच्यावरही निशाणा साधला. 

जिल्हा नियोजन समितीचे सदस्य सत्यजित कदम यांनी पत्रकात म्हटले आहे, ‘ सलग अठरा वर्षे कोल्हापूर शहरातून आमदार, मागील पंधरा वर्षे महानगरपालिकेवर एक हाती सत्ता, शहरातील दोन्ही आमदार स्वतःचे, स्वतः अठरा वर्षे आमदार व साडेसात वर्षे मंत्री व पालकमंत्री इतके सगळे असताना कोल्हापूर शहराला आमदार सतेज पाटील यांच्याकडून कोल्हापूरला काही मिळाले नाही. खड्डेमुक्त करण्याच्या नावाखाली आमदार पाटील यांनी सत्तेत असताना ३५ कोटी रुपयांचा निधी आणला होता, त्या निधीचे काय झाले  ? आता त्यांनी नवीन ५० कोटी रुपये मागितले आहेत त्याऐवजी त्यांनी दोन्ही आमदारांचा व स्वतःचा विकासनिधी का वापरत नाहीत याचेही उत्तर कोल्हापूरच्या जनतेला द्यावे. ”

काँगेसचे तीन आमदार कोल्हापूर शहरातील रहिवासी आहेत असे असूनही त्यांनी आजपर्यंत रस्त्यां विषयात कोणतीही ठोस भूमिका घेतली नाही. रस्त्याच्या विषयात आंदोलन करताना काँग्रेस ही गोष्ट विसरत आहे की कोल्हापूरच्या शहरवासीयांवर टोलचे भूत याच काँग्रेसच्या माध्यमातून लादण्यात आले होते.’