महाराष्ट्र न्यूज वन प्रतिनिधी, कोल्हापूर : राधानगरी, भुदरगड मतदारसंघातील विधानसभा व बिद्री कारखाना निवडणुकीच्या निमित्ताने जवळपास दोन दशके आमनेसामने उभे ठाकत असलेले पालकमंत्री प्रकाश आबिटकर आणि माजी आमदार के. पी. पाटील हे गोकुळ दुध संघाच्या निवडणुकीच्या निमित्ताने एका व्यासपीठावर आले. अर्जुनवाडा येथे आयोजित प्रचार मेळाव्यात भाषण करताना आबिटकर व पाटील यांनी, ‘महायुतीच्या ऐतिहासिक विजयात राधानगरी- भुदरगड तालुक्यांचा सिंहाचा वाटा असा विश्वास व्यक्त केला.
             
महायुतीच्या छत्रपती शाहू शेतकरी विकास आघाडीच्या उमेदवारांच्या प्रचारार्थ राधानगरी व भुदरगड तालुक्यातील ठराव धारकांच्या मेळाव्याला जोरदार प्रतिसाद मिळाला. मंत्री हसन मुश्रीफ, यावेळी खासदार धनंजय महाडिक, माजी आमदार संजय घाटगे, गोकुळचे ज्येष्ठ संचालक अरुण डोंगळे, केडीसीसी बँकेचे संचालक ए.वाय. पाटील, धैर्यशील पाटील- कौलवकर यांची प्रमुख उपस्थिती होती.