महाराष्ट्र न्यूज वन प्रतिनिधी, कोल्हापूर : प्रेम प्रकरणातून तरुणाच्या हत्येची घटना शुक्रवारी रात्री घडली. पुलाची शिरोली सांगली फाटा येथे रात्री बारा वाजण्याच्या सुमारास ही घटना घडली. तरुणीच्या नातेवाईकांनी केलेल्या या हल्ल्यात हातकणंगले तालुक्यातील पाडळी येथील संकेत संदीप खामकर या तरुणाचा मृत्यू झाला. शिरोली पोलिस ठाण्यात गुन्हा दाखल झाला आहे.
संकेत खामकरचे पेठवडगाव येथील एका मुलीशी प्रेमसंबंध होते. शुक्रवारी, शिरोली-सांगली फाटा येथील बुधले मंगल कार्यालय येथे मुलीच्या नातेवाईकाचा कौटुंबींक कार्यक्रम होता. संकेत हा त्या मुलीला भेटण्यासाठी कार्यक्रमस्थळी मित्रासोबत आला होता. मुलीचे नातेवाईक व संकेत या दोघांत त्या परिसरात वादावादी झाली. शाब्दिक वाद वाढत गेला.
प्रकरण मारामारीपर्यंत पोहोचले. मारहाणीत धारदार शस्त्रांचा वापर केल्याचे पोलिस तपासतून पुढे येत आहे. संकेत सोबत असलेल्या मित्रालाही धमकावण्यात आले. घाबरलेल्या अवस्थेत त्या मित्राने तेथनू पळ काढला. संकेतच्या नातेवाईकांना फोन करुन घटनेची माहिती दिली. नातेवाईक घटनास्थळी येईपर्यंत संकेत रक्ताच्या थारोळयात पडला होता. पोलिस ही घटनास्थळी पोहोचले होते. संकेतला उपचारासाठी हलविण्यात आले. दरम्यान उपचारापूर्वीच त्याचा मृ़त्यू झाल्याचे डॉक्टरांनी सांगितले. संकेत हा सैन्यदलात भरती होण्याची तयारी करत होता. आजींनी त्याचा सांभाळ केला होता.