महाराष्ट्र न्यूज वन  : शहीद वीरपत्नी लक्ष्मी महाविद्यालय, तिटवे येथे गेले दोन दिवस रंगलेल्या विभागीय युवा महोत्सवाची  रंगतदार सांगता झाली. विविध कलाप्रकार, सर्जनशीलता आणि उत्साहाच्या बहारदार मेजवानीतून ‘शहीद’च्या रंगमंचावर संस्कृतीचे इंद्रधनुष्य फुलले.

अकरा महाविद्यालयांच्या चुरशीच्या स्पर्धेत शहीद वीरपत्नी लक्ष्मी महाविद्यालयाने जनरल चॅम्पियनशिप पटकावून इतिहास रचला.  उपविजेतेपद पुण्यातील एसएनडीटी आर्ट्स अँड कॉमर्स कॉलेज फॉर वुमनने मिळवले. विजेत्यांचा गौरव डॉ. नितीन प्रभू तेंडुलकर, एसएनडीटी सांस्कृतिक समन्वयक किरण गायकवाड, डीवायएसपी सुवर्णा पत्की व पीएसआय स्वाती यादव यांच्या हस्ते करण्यात आला. अध्यक्षस्थानी वीरपत्नी लक्ष्मीबाई सिताराम पाटील होत्या. महोत्सवात साडेतीनशेहून अधिक विद्यार्थिनींनी तब्बल 26 कला प्रकारांतून आपल्या कला सादर केल्या. लिटरेचर, थिएटर आणि डान्स या कलाप्रकारात ‘शहीद’ने  चॅम्पियनशिप पटकावत वर्चस्व सिद्ध केले. म्युझिक इव्हेंटमध्ये पीजीएसआर कॉलेज, पुणे, तर फाइन आर्ट्समध्ये एम. के. एस. एस. कॉलेज, रत्नागिरी विजयी ठरले.

समन्वयनाची धुरा डॉ. नितीन प्रभू तेंडुलकर व किरण गायकवाड यांनी सांभाळली. शहीद महाविद्यालयाचे समन्वयक म्हणून प्रा. अविनाश पालकर यांनी प्रभावी जबाबदारी पार पाडली. डॉ. जगन्नाथ पाटील यांच्या मार्गदर्शनातून हा सांस्कृतिक सोहळा झाला. प्राचार्य  प्रशांत पालकर यांनी प्रस्ताविक केले. प्रा. शुभांगी भारमल व  प्रा. तेजस्विनी परबकर यांनी सूत्रसंचालन केले.  प्रा. दिग्विजय कुंभार यांनी आभार मानले.उपप्राचार्य सागर शेटगे, विविध महाविद्यालयांतील प्राध्यापक, शिक्षक-शिक्षकेतर कर्मचारी व उत्साही विद्यार्थिनींच्या उपस्थितीने महोत्सव संस्मरणीय ठरला.