शिवाजी विद्यापीठात फुले – शाहू - आंबेडकर सप्ताहाचे आयोजन
schedule07 Apr 25 person by visibility 92 categoryसामाजिक
महाराष्ट्र न्यूज वन प्रतिनिधी, कोल्हापूर : शिवाजी विद्यापीठाच्यावतीने ९ एप्रिल ते १४ एप्रिल २०२५ या कालावधीत डॉ. बाबासाहेब आंबेडकर जयंतीनिमित्त फुले - शाहू -आंबेडकर सप्ताहाचे आयोजन केले आहे. ९ एप्रिल रोजी सकाळी १०.३० वाजता विद्यापीठाच्या मानव्यशास्त्र सभागृहामध्ये सप्ताहाचे उदघाटन होणार आहे. या समारंभावेळी प्रा. दत्ता भगत लिखित “भारतीय स्वातंत्र्य चळवळीमध्ये डॉ. बाबासाहेब आंबेडकरांचे योगदान” या ग्रंथाचे प्रकाशन करण्यात येणार आहे. प्रा. डॉ. गिरीश मोरे व प्रा. डॉ. पी. एस.कांबळे यांची व्याख्याने होणार असून प्र- कुलगुरू प्रा. डॉ. पी. एस. पाटील हे अध्यक्षस्थानी असतील.
१० एप्रिलला डॉ. पंजाबराव देशमुख यांच्या स्मृतिदिनानिमित्त “डॉ. पंजाबराव देशमुख यांचे शिक्षणविषयक विचार व कार्य ” या विषयावर डॉ. नितीन रिंढे (मुंबई) यांचे व्याख्यान शिवाजी विद्यापीठाच्या "शिववार्ता" या युट्यूब चॅनेलवरून सकाळी १०.३० वाजता ऑनलाईन प्रसारित होईल. ११ एप्रिलला महात्मा जोतीराव फुले यांच्या जयंतीनिमित्त “महात्मा जोतीराव फुले यांचे शिक्षणविषयक विचार व कार्य ” या विषयावर डॉ. श्यामसुंदर मिरजकर (मायणी) यांचे व्याख्यान शिवाजी विद्यापीठाच्या "शिववार्ता" या युट्यूब चॅनेलवरून सकाळी १०.३० वाजता ऑनलाईन प्रसारित होईल.
बारा एप्रिलला “लघुपट सादरीकरण व चर्चा ” मानव्यशास्त्र सभागृहात होणार असून यावेळी चित्रपट समिक्षक डॉ. अनमोल कोठाडिया हे प्रमुख वक्ते म्हणून उपस्थित राहणार आहेत. तेरा एप्रिलला “राजर्षी छत्रपती शाहू महाराज यांचे शिक्षणविषयक विचार व कार्य ” या विषयावर ज्येष्ठ पत्रकार श्रीराम पचिंद्रे यांचे व्याख्यान शिवाजी विद्यापीठाच्या "शिववार्ता" या युट्यूब चॅनेलवरून सकाळी १०.३० वाजता ऑनलाईन प्रसारित होईल.
चौदा एप्रिलला कुलगुरू डी. टी. शिर्के, प्रकुलगुरू डॉ. पी. एस. पाटील यांच्या हस्ते भारतरत्न डॉ. बाबासाहेब आंबेडकर यांच्या प्रतिमेचे पूजन सकाळी दहा वाजता प्रतिमापूजन व अभिवादन करण्यात येईल. यानंतर राजर्षी शाहू सिनेट सभागृहात “डॉ. बाबासाहेब आंबेडकर यांचे शिक्षणविषयक विचार व कार्य ” या विषयावर अमिटी विद्यापीठाचे उप प्र-कुलगुरू डॉ. गौतम गवळी यांचे व्याख्यान होईल. सर्वांनी या विविध उपक्रमास उपस्थित राहून सहभागी व्हावे असे आवाहन डॉ. बाबासाहेब आंबेडकर संशोधन व विकास केंद्राचे संचालक व अधिष्ठाता प्रा.डॉ. श्रीकृष्ण महाजन व कुलसचिव डॉ. व्ही. एन. शिंदे यांनी केले आहे.
