भविष्य निर्वाह निधीतील पावणे सात लाख रुपये काढण्यासाठी पाच हजार रुपयांची लाच स्वीकारताना आरोग्य सेवा उपसंचालक कार्यालयाततील मुख्य प्रशासकीय अधिकारीला लाचलुचपत प्रतिबंधक विभागाने सापळा रचून रंगेहात पकडले. भावना सुरेश चौधरी असे महिला अधिकारीचे नाव आहे.

पोलिसांनी या कारवाईची माहिती दिली. आरोग्य सेवा उपसंचालक कार्यालयात एका तक्रारदाराने त्याच्या भविष्य निर्वाह निधीतील 90 टक्के रक्कम म्हणजेच सहा लाख 72 हजार काढण्यासाठी अर्ज दिला होता. त्यासाठी आरोग्य सेवा उपसंचालक कार्यालयातील मुख्य प्रशासकीय अधिकारी भावना चौधरी यांनी त्यांच्याकडे सहा हजार सातशे रुपयांची लाच मागितली. त्यानंतर तक्रारदाराने लाच लुचपत प्रतिबंधक विभागाकडे तक्रार अर्ज केला. तक्रारीची खातरजमा केल्यानंतर आज गुरुवारी रक्षाबंधनाच्या दिवशी कसबा बावडा रोडवरील मुख्य प्रशासकीय इमारतीतील आरोग्य सेवा उपसंचालक कार्यालयात सापळा रचण्यात आला. या कार्यालयात स्वातंत्र्याच्या अमृत महोत्सवी कार्यक्रमाचे आयोजन केले होते. रक्षाबंधन सण असल्याने सर्व कर्मचारी नटून थटून आले होते. मुख्य प्रशासकीय अधिकारीही चौधरी ही नटून-थटून आल्या होत्या. तक्रारदाराने चौधरी यांची भेट घेतल्यानंतर लाचेच्या सहा हजार सातशे रुपये रकमेपैकी 5000 रक्कमेवर तडजोड झाली. ही रक्कम स्वीकारताना लाच लुचपत प्रतिबंध विभागाच्या अधिकारी आणि पोलिसांनी भावना चौधरी यांना लाच घेताना रंगेहात पकडले. या घटनेने मध्यवर्ती प्रशासकीय इमारतीत खळबळ उडाली. पोलीस उप अधीक्षक आदिनाथ बुधवंत यांच्या नेतृत्वाखाली पोलीस कॉन्स्टेबल शरद पोरे, मयूर देसाई, रुपेश माने, संदीप पडवळ, छाया पाटोळे यांनी कारवाईत भाग घेतला.