महाराष्ट्र न्यूज वन प्रतिनिधी, कोल्हापूर :
शरीर सुदृढ बनवण्यासाठी जिममध्ये धोकादायक औषध देणाऱ्या दोघा जणांना स्थानिक गुन्हे अन्वेषण विभागाने अटक केली. प्रशांत मोरे (रा. मोरेवाडी, ता. करवीर) आणि ओंकार अरुण भोई (वय २४ रा.सुप्रभात कॉलनी, आपटे नगर) अशी दोघां संशयितांची नावे आहेत.
शरीर सुदृढ करण्यासाठी कळंबा मेन रोड लगेच असलेल्या एस प्रोटीन्स आणि एस फिटनेस जिम या ठिकाणी प्रशांत मोरे ही व्यक्ती 'मेफेनटेमाईन सल्फेट' नावाचे धोकादायक इंजेक्शनची विक्री करत असल्याची माहिती स्थानिक गुन्हे अन्वेषण विभागाच्या पोलिसांना मिळाली .पोलीस निरीक्षक रवींद्र कळमकर यांनी तपास करण्यासाठी दोन पथके स्थापन केली. पोलिसांनी औषध निरीक्षकासमवेत कळंबा येथील एस प्रोटीन्स आणि सुर्वेनगर येथील एस फिटनेस जिममध्ये छापा टाकला.
या ठिकाणी जिमचा चालक प्रशांत मोरे याने ओंकार भोई याला कामाला ठेवले असून प्रशांत मोरे ओंकार भोईच्या मदतीने इंजेक्शन विकत असल्याचे तपासात निष्पन्न झाले.पोलिसांना एस प्रोटीन्स आणि एस फिटनेस या ठिकाणी मेफेनटेमाईन सल्फेट इंजेक्शनच्या ६४ बाटल्या आणि सिरींज मिळाल्या. पोलिसांनी मोरे आणि भोई या दोघांना अटक केलेली आहे.
स्थानिक गुन्हे अन्वेषण विभागाचे पोलीस निरीक्षक रवींद्र कळमकर यांच्या मार्गदर्शनाखाली सहाय्यक पोलीस निरीक्षक सागर वाघ, पोलीस उपनिरीक्षक शेष मोरे, पोलीस अंमलदार विकास किरोळकर, संजय कुंभार, अमोल कोळेकर, प्रशांत कांबळे, सुरेश पाटील, संतोष पाटील, राजू कांबळे , विनोद कांबळे ,संजय पडवळ ,दीपक घोरपडे ,संजय कुंभार यांनी या गुन्ह्याचा तपास केला.