महाराष्ट्र न्यूज वन प्रतिनिधी कोल्हापूर:
साडेसत्तावीस हजार रुपयांची लाच मागणाऱ्या तलाठी आणि महसूल सहाय्यक असलेल्या क्लार्कला लाचलुचपत प्रतिबंधक विभागाने पकडले.
स्वप्नील वसंतराव घाटगे ( वय - ३९ वर्षे. पद - तलाठी, सजा जयसिंगपूर, ता.शिरोळ, रा. रुकडी, ता.हातकणंगले) आणि शिवाजी नागनाथ इटलावार (वय ३२ वर्षे, पद- महसुल सहायक, तहसीलदार कार्यालय शिरोळ, सध्या रा.कसबा बावडा,कोल्हापूर, मुळ रा. कुंडलवाडी, ता.बिलोली, जि.नांदेड) अशी लाच मागणाऱ्या दोघां संशयितांची नावे आहेत.
लाचलुचपत प्रतिबंधक विभागाच्या अधिकाऱ्यांनी कारवाईची माहिती दिली. जयसिंगपूर येथील डवरी वसाहतीत असलेल्या प्लॉटच्या क्षेत्रफळामध्ये तफावत असल्याबाबत केलेल्या अर्जाचे कामकाज हे तक्रारदार पाहत होते तक्रारदाराने प्लॉटच्या क्षेत्रफळामध्ये तफावत असल्या संदर्भात तक्रार अर्ज हा जयसिंगपूर येथील तलाठी स्वप्निल घाटगे यांचेकडे दिला होता. सदर क्षेत्रफळ दुरुस्ती करून सात बारा उतारा मिळणेकरिता तलाठी घाटगे यांनी स्वतः आणि तहसीलदार शिरोळ तहसील कार्यालय येथील क्लार्क शिवाजी नागनाथ इटलावार यांच्याकरिता व खाजगी टायपिस्ट यांच्याकरीता तक्रारदाराकडे २७ हजार ५०० रुपयांची लाच मागितली. तसेच क्लार्क इटलावार यांनी तलाठी घाटगे यांनी सांगितलेप्रमाणे तक्रारदाराकडे पाच हजार रुपयांची मागणी केली आहे. पोलिसांनी लाच मागणीची खातरजमा करुन दोघां आरोपीं विरुद्ध जयसिंगपूर पोलीस ठाण्यात गुन्हा दाखल होण्याची कारवाई सुरू आहे.
लाचलुचपत प्रतिबंधक विभागाचे पोलीस उपअधीक्षक सरदार नाळे यांच्या मार्गदर्शनाखाली पोलीस निरीक्षक आसमा मुल्ला, सहाय्यक पोलीस फौजदार प्रकाश भंडारे, पोलीस अंमलदार अजय चव्हाण, विकास माने, पोलीस नाईक सुधीर पाटील, सचिन पाटील, पोलीस काॅन्स्टेबल संदीप पवार, सूरज अपराध, विष्णू गुरव यांनी कारवाईत भाग घेतला.