महाराष्ट्र न्यूज वन प्रतिनिधी कोल्हापूर : महापालिका निवडणुकीतील जागा वाटपातील घोळ, निवडणुकीत पक्षाच्या वाटेला आलेला पराभव त्यामुळे शिवसेनेतील अस्वस्थता संपायची काही चिन्ह दिसेनात. शिवसेनेचे शहर उपप्रमुख शशिकांत बिडकर यांनी पदाचा राजीनामा दिला आहे तसेच जिल्हा झोपडपट्टी संघटक पदाचाही त्यांनी राजीनामा देत असल्याचे म्हटले आहे. त्यांनी राजीनामा देताना असे म्हटले आहे की, " सध्या कोल्हापूर जिल्ह्यामध्ये शिवसेना ठाकरे पक्ष हा काँग्रेस पक्षातर्फे चालविला जात आहे. यामुळे पक्षाचे स्वतंत्र अस्तित्व राहिले नाही. त्यास कंटाळून शिवसेना ठाकरे पक्षातील पदाचा राजीनामा देत आहे ". बिडकर यांनी महापालिका निवडणुकीमध्ये शिवसेना ठाकरे पक्षाकडे उमेदवारी मागितली होती. मात्र त्यांना उमेदवारी मिळाली नव्हती. त्यांनी राष्ट्रवादी काँग्रेस शरद पवार पक्षाकडून निवडणूक लढवली होती. गेले काही दिवस ते शिवसेनेत नाराज दिसत होते. त्यांनी शिवसेना शहरप्रमुख सुनील मोदी यांच्याकडे राजीनामा पाठवला आहे. मोदी यांनीही काही दिवसांपूर्वी शहरप्रमुख पदाचा राजीनामा दिला होता मात्र पक्षाने तो स्वीकारला नसल्याचे वृत्त आहे. दरम्यान कोल्हापूर महानगरपालिका निवडणुकीत काँग्रेस आणि शिवसेना ठाकरे पक्ष यांची आघाडी झाली होती. जागा वाटपात  शिवसेनेला सहा जागा मिळाल्या होत्या. नगरसेविका प्रतिज्ञा उत्तरे यांच्या रूपाने शिवसेनेचा एकमेव नगरसेवक महापालिकेवर निवडून आला आहे. शिवसेना ठाकरे पक्षात  गटबाजी आहे. पदाधिकाऱ्यांच्यामध्ये ही एकवाक्यता नाही.