महाराष्ट्र न्यूज वन प्रतिनिधी, कोल्हापूर -: गोकुळ दूध संघाच्या पंचवार्षिक निवडणुकीत महायुती आणि महाविकास आघाडीची प्रतिष्ठा पणाला लागली आहे. गोकुळमध्ये सत्ता मिळवण्यासाठी नेते मंडळी शर्थीचे प्रयत्न करत आहेत. निवडणुकीत क्रॉस व्होटिंग आणि दगाफटका होऊ नये म्हणून महायुतीच्या नेतेमंडळींनी कमालीची सतर्कता बाळगली आहे. शुक्रवारी १६ ऑक्टोबर २०२६ रोजी महायुतीच्या काही नेते मंडळींनी सौंदती डोंगर येथे जाऊन यल्लमा देवीचे दर्शन घेतले. ओटी भरली. तसेच शपथ घेतली. देवीचे दर्शन घेण्यापूर्वी, येथे ठरावधारकांचा मेळावा झाला. शपथ घ्यायला जग आणि परडी कार्यक्रमस्थळी आणली होती. ठरावधारकांना शपथ देण्यात आली. ‘२५ मते महायुतीला देणार, कपबशीला मतदान करणार.’

मंत्री हसन मुश्रीफ, खासदार धनंजय महाडिक, माजी खासदार संजय मंडलिक, माजी आमदार संजय घाटगे, जिल्हा परिषदेच्या अध्यक्षा शिल्पा खोत, जिल्हा मध्यवर्ती बँकेचं संचालक भैया माने, गोकुळ निवडणुकीतील उमेदवार नविद मुश्रीफ, अंबरिश घाटगे, युवराज पाटील, विरेंद्र मंडलिक, शशिकांत खोत आदींनी देवीचे दर्शन घेतले. तत्पूर्वी येथे झालेल्या मेळाव्यात मंत्री मुश्रीफ व खासदार महाडिक यांनी मार्गदर्शन केले.

या मेळाव्याला ठरावधारक कुटुंबासहित उपस्थित होते. मंत्री मुश्रीफ ठरावधारकांना उद्देशून म्हणाले की, ‘ निवडणुकीतील दगाबाजीचा फटका गरीब उमेदवारांना होतो. त्यांची आर्थिक धूळदाण होते. हे टाळयासाठी आपण साऱ्यांनी पॅनेल टू पॅनेल मतदान करायचे. माझ्यासहित साऱ्यांनी शपथ घ्यायची. मी शपथ घेतो की निवडणुकीत गद्दारी करणार नाही. २५ मते कपबशीला देणार.  कागलची अब्रू वाचवा, तुम्हाला आमची शपथ आहे. यल्लमा देवी जागृत आहे, खोटं बोललं की देवी अंगावर उठते.’अशी शपथ घेण्यात आली. माजी खासदार महाडिक म्हणाले, ‘ गोकुळची निवडणूक ही नावाजलेली दूध संस्थेची निवडणूक आहे. महायुतीला कोणीही गालबोट लावू नका. नेतेमंडळींना धोका होता कामा नये.सगळयांच्या अगोदर आम्हीही शपथ घेणार आहे. नेतेमंडळी, उमेदवारांची जबाबदारी आहे. शपथ एवढीच घ्यायची आहे की, रविवारी होणाऱ्या गोकुळच्या निवडणुकीसाठी २५ पैकी २५ मते मी कपबशीला देणार आहे. राज्यपातळीवर नेत्यांची कॉलर ताठ असली पाहिजे’