महाराष्ट्र न्यूज वन प्रतिनिधी कोल्हापूर -: ‘शिवाजी विद्यापीठ सिनेट सदस्य, महापालिका नगरसेवक, स्थायी समिती सभापती, परिवहन समिती सभापती, पक्ष संघटक अशा विविध पातळीवर मी काम केले आहे.कार्यकर्ता म्हणून माझी ओळख आहे. आज पदवीधरांच्यासमोर विविध प्रश्न आहेत. पदवीधरांच्या प्रश्नासाठी लढणारा मी कार्यकर्ता आहे.नोकरी, रोजगार, स्थलांतरण, पेपरफुटी, भरती असे विविध विषय भेडसावत आहेत. या साऱ्या प्रश्नांच्या सोडवणुकीला आपले प्राधान्य राहील. हे सारे प्रश्न सोडवू’अशी भूमिका  पुणे विभागीय पदवीधर मतदारसंघातील शिवसेना ठाकरे पक्षाचे उमेदवार व नगरसेवक सुनील मोदी यांनी मांडली.

 सध्या पदवीधर आणि शिक्षक मतदारसंघाची निवडणुकीची धामधूम सुरू आहे. जिल्हानिहाय मेळावे सुरू आहेत. शिवसेना ठाकरे पक्ष पहिल्यांदाच पुणे विभागीय पदवीधर मतदारसंघाची निवडणूक लढवित आहे. शिवसेना पक्षप्रमुख उद्धव ठाकरे, युवा नेते व आमदार आदित्य ठाकरे यांनी पुणे विभागीय पदवीधर मतदारसंघातून नगरसेवक मोदी यांची उमेदवारी जाहीर केली आहे. शिवसेना नेते व माजी खासदार विनायक राऊत, आमदार सुनील प्रभू, उपनेते प्रा. नितीन बानुगडे पाटील, संपर्कप्रमुख अरुण दुधवडकर,उपनेते संजय पवार, सहसंपर्कप्रमुख विजय देवणे, जिल्हाप्रमुख विराज पाटील, महिला संघटक व नगरसेविका प्रतिज्ञा उत्तुरे, शहरप्रमुख मंजीत माने, विशाल देवकुळे आदींच्या उपस्थितीमध्ये कोल्हापुरात प्रचार मेळावा झाला.

उमेदवार मोदी म्हणाले, ‘शिवसेना पक्षप्रमुख उद्धव ठाकरे यांनी माझी उमेदवारी घोषित केली, पदवीधरमधून मी आज शिवसेनेचा उमेदवार म्हणून आमदारकीसाठी लढत आहे. पक्षप्रमुख ठाकरे यांनी माझी उमेदवारी घोषित करुन, दोन तास बैठक घेऊन प्रचाराचे नियोजन केले हे मी माझे भाग्य समजतो. प्रत्येक कार्यकर्त्याने पंचवीस पदवीधर मतदारांशी संवाद साधत मतदानास प्रवृत्त केले तर शिवसेनेचा आमदार निवडून येण्यामध्ये काही अडचण नाही. शिवसेना निवडणुकीच्या मैदानातून कधीही माघार घेणार नाही. राष्ट्रवादी काँग्रेस शरद पवार पक्षाने, शिवसेनेला गृहित धरू नये. अन्यथा राष्ट्रवादीच्या उमेदवाराला चौथ्या क्रमांकावर  ढकलू.’