महाराष्ट्र न्यूज वन प्रतिनिधी, कोल्हापूर : कोल्हापूर जिल्हा कार डीलर्स असोसिएशनच्या सहाव्या वर्धापन दिननिमित्त ‘केडीएल प्रीमियर लीग’ टेनिस बॉल क्रिकेट स्पर्धा आयोजित केली आहे. सात ते नऊ  एप्रिल  २०२६ या कालावधीत शास्त्रीनगर मैदानावर सकाळी आठ ते सायंकाळी सहा वाजेपर्यंत सामने  होणार आहेत. या स्पर्धेत एकूण सोळा संघ सहभागी आहेत अशी माहिती संयोजकांनी दिली.

असोसिएशनचे दाऊद पठाण, राजेश घोरपडे, सुधाकर सासणे , महेश संकपाळ, फय्याज अथणीकर, इजाज नागरकट्टी यांनी पत्रकार परिषदेत यासंदर्भातील माहिती दिली. स्पर्धेचे हे पहिलेच वर्ष आहे. या स्पर्धेत कोल्हापूर शहर व उपनगरातील वाहन व्यवसाय आणि जुनी कार खरेदी विक्री करणाऱ्या सुमारे ५०० खेळाडूंनी सहभाग घेतला आहे. एकूण १६ संघ खेळतील. यामध्ये अण्णा मोटर्स, गवळी मोटर्स, ओम मोटर्स, साई व्हील्स, आय कार्स, युनिक कार्स, श्री मोटर्स, सोना कार्स, स्वामी मोटर्स, शिवानंद मोटर्स, डी मोटर्स, बाबा मोटर्स, प्रगती मोटर्स, एस एम मोटर्स, कोल्हापूर डीएसए आणि पांजरपोळ यांचा समावेश आहे.

स्पर्धेचा सांगता समारंभ आणि बक्षीस वितरण महापौर रूपाराणी निकम आणि उपमहापौर अक्षय जरग यांच्या प्रमुख उपस्थितीत ९ एप्रिल रोजी सायंकाळी पाच वाजता शास्त्रीनगर ग्राउंड येथे होणार आहे. विजेत्या संघाला चषक आणि अकरा हजार रुपये, दुसरे बक्षीस सात हजार रुपये आणि तिसरे बक्षीस पाच हजार रुपये देण्यात येणार आहे. सर्व संघांना किट देण्यात येणार असून उत्कृष्ट गोलंदाज उत्कृष्ट फलंदाज, उत्कृष्ट यष्टिरक्षक, मॅन ऑफ द मॅच अशी बक्षिसे देण्यात येणार आहेत. विजेत्या संघाला एक फिरता व एक कायमस्वरुपी  असे दोन चषक देण्यात येणार आहेत.