महाराष्ट्र न्यूज वन प्रतिनिधी, कोल्हापूर : कोल्हापूर महापालिकेच्या सोमवारी झालेल्या सर्वसाधारण सभेत पाणीपटटी दरवाढीला ठराव सभागृहाने प्रलंबित ठेवला. शहराला अगोदर पाणी पुरवठा सुरळीतपणे करा, त्यानंतर दरवाढीचा प्रस्ताव आणा असे खडसावत नगरसेवकांनी हा विषय पुढील मिटींग केला. दरम्यान राजोपाध्येनगरमधील महापालिकेच्या मालकीच्या सव्वा एकर जागा दहा वर्षासाठी भाडेतत्वावर देण्याच्या ठरावावरुन सभागृहात सत्ताधारी आणि विरोधक आमनेसामने उभे ठाकले. या ठरावाला विरोधी आघाडीच्या सदस्यांनी विरोध केल्यानंतर मतदानावर निर्णय झाला. सत्ताधारी आघाडीच्या ४३ सदस्यांनी ठरावाच्या बाजूने मतदान केले तर ठरावाच्या विरोधात २९ नगरसेवकांनी मतदान केले. या ठरावावरील चर्चेदरम्यान सत्ताधारी व विरोधकांत चांगलेच वाकयुद्ध गाजले. महापौर रुपाराणी निकम सभेच्या अध्यक्षस्थानी होत्या.

सांस्कृतिक केंद्र व वाचनालय याकरिता आरक्षित ४०६७ चौरस मीटर जागा एका खासगी संस्थेला सांस्कृतिक भवन उभारणीसाठी दहा वर्षे भाडेतत्वावर देणे व त्यासाठी प्रती चौरस मीटर ४८ रुपये भाडे आकारणी असा प्रस्ताव इस्टेट विभागाने मांडला होता. या प्रस्तावाला काँग्रेस आघाडीच्या सदस्यांनी विरोध केला. नगरसेवक सुनील मोदी यांनी महापालिकेच्या मालकीची जागा भाडेकराराने देणे अयोग्य आहे यामुळे हा प्रस्ताव मंजूर करू नये. मुळात ज्या कंपनीला ही जागा दिली जाणार आहे त्याचे ऑडिट नाही, नोंदणी नाही. त्या पत्राची आवक जावक नोंद नाही. निविदा प्रक्रिया राबविली नाही. नियमांना डावलून जागा देण्याचा अट्टाहास कशासाठी असा सवाल केला.