महाराष्ट्र न्यूज वन प्रतिनिधी, कोल्हापूर : भागीरथी पतसंस्थेच्या अध्यक्षा अरूंधती महाडिक यांची महाराष्ट्र राज्य पतसंस्था फेडरेशनच्या महिला प्रदेशाध्यक्षपदी निवड करण्यात आली. महाराष्ट्र राज्य सहकारी पतसंस्था फेडरेशनच्यावतीने कोल्हापुरातील आनंद भवन इथे सहकारी पतसंस्थांचा महिला मेळावा पार पडला. याप्रसंगी खासदार धनंजय महाडिक यांना सहकाररत्न पुरस्काराने गौरव करण्यात आला. पतसंस्था फेडरेशनचे राज्य अध्यक्ष काकाजी कोयटे, शांतीलाल शिंगे, शशिकांत राजोबा, राजश्री पाटील, सुरेखा लवांडे, डॉ. अंजली शहा, भारती मुथा, अनिल पाटील, सहकार नियामक मंडळाचे सदस्य सदाशिव भुसारे, जिल्हा परिषदेचे उपाध्यक्ष तानाजी पाटील, उपमहापौर अक्षय जरग, स्थायी समिती सभापती विशाल शिराळे,  चॅनेल बी चे व्यवस्थापकीय संचालक पृथ्वीराज महाडिक, भाजप युवा मोर्चा प्रदेशाध्यक्ष कृष्णराज महाडिक यांच्या उपस्थितीत हा मेळावा झाला. पतसंस्था फेडरेशनच्या महिला प्रदेशाध्यक्षपदी सौ. अरूंधती महाडिक यांची निवड झाल्याची घोषणा कोयटे यांनी केली.सहकारातून समृध्दीकडे देशाची वाटचाल सुरू आहे. अशा वेळेस पतसंस्थांची चळवळ अधिक सक्षम करण्यासाठी पतसंस्थांमधील ठेवींना ५ लाख रूपयांचं विमा संरक्षण मिळावे, युपीआय प्रणालीचा वापर करायला परवानगी मिळावी आणि गावातील सेवा सोसायट्यांना दिली जाणारी ४० प्रकारची कामे पतसंस्थांना दिली जावीत, या मागण्यांचा संसदेत पाठपुरावा करू, अशी ग्वाही खासदार धनंजय महाडिक यांनी दिली. फेडरेशनचे अध्यक्ष काकाजी कोयटे यांनी, राज्यातील पतसंस्थांची सद्यस्थिती, त्यांच्यापुढील आव्हाने आणि मागण्या मांडल्या.यावेळी भाजप युवा मोर्चाच्या प्रदेशाध्यक्षपदी निवड झाल्याबद्दल, कृष्णराज महाडिक यांचा सत्कार करण्यात आला.