महाराष्ट्र न्यूज वन प्रतिनिधी, कोल्हापूर : शिवाजी विद्यापीठातर्फे २०२३ पासून विद्यार्थ्यांकडून २५ रुपये इतक्या घेण्यात येणाऱ्या ज्युबिली फंडाचा संपूर्ण व पारदर्शक आर्थिक लेखाजोखा जाहीर करावा, आजपर्यंत जमा झालेला निधी विद्यार्थ्यांच्या संशोधन, शैक्षणिक गुणवत्ता, कौशल्यविकास व विद्यार्थीहिताच्या उपक्रमांसाठी वापरावा तसेच यापुढे विद्यार्थ्यांकडून फंडाच्या नावाखाली कोणतीही अतिरिक्त रक्कम आकारू नये, या मागण्यांसाठी अखिल भारतीय विद्यार्थी परिषद, कोल्हापूर महानगरतर्फे बुधवारी, ३० सप्टेंबर २०२६ रोजी शिवाजी विद्यापीठात जोरदार निदर्शने करण्यात आली. यावेळी अभाविपच्या कार्यकर्त्यांनी, मुख्य प्रवेशद्वावर चढून आत जाण्याचा प्रयत्न केला. मात्र सुरक्षारक्षकांनी त्यांना प्रवेशद्वारातच अडविले. यावेळी कार्यकर्ते व सुरक्षारक्षकांत झटापट झाली. अखेर कुलगुरू डॉ. राजनीश कामत, प्रकुलगुरू डॉ. ज्योती जाधव यांनी कार्यकर्त्यांचे निवेदन स्वीकारत याविषयी चर्चा केली. २ नोव्हेंबर २०२६ रोजी अभाविपच्या मागण्यांबाबत विद्यार्थीहिताचा विचार करून सकारात्मक निर्णय घेण्यात येईल, असे विद्यापीठ प्रशासनाने म्हटले आहे. सकारात्मक निर्णय घेण्याचे आश्वासन मिळाल्याने अभाविपने आंदोलन स्थगित केले. आंदोलनात यावेळी कोल्हापूर महानगर मंत्री प्रेम राजमाने, सहमंत्री साक्षी जाधव, साहिल पाटील, अभय शेलार, सांगली जिल्हा संयोजक केतन शेंडगे, कराड, सातारा मधून विद्यार्थी कार्यकर्ते उपस्थित होते.