महाराष्ट्र न्यूज वन प्रतिनिधी कोल्हापूर :
मशिदीची कमिटी बरखास्त केल्याच्या कारणावरून झालेल्या तलवार हल्ल्यात दोघे भाऊ गंभीर जखमी झाले. मेहबूबखान तोताखान पठाण (वय ६२) आणि नासर तोताखान पठाण ( वय ५८, दोघे रा. सदर बाजार)हे दोघे भाऊ गंभीर जखमी झाले आहेत. शनिवारी दुपारी एक वाजता ही घटना घडली.
याप्रकरणी शाहूपुरी पोलीस ठाण्यात अझर दस्तगीर फकीर (वय ४८ रा. सदर बाजार) आणि त्याच्या पाच सहकाऱ्यांच्यावर गुन्हा नोंद झाला आहे. काल शुक्रवारी रात्री पोलिसांनी सदर बाजार परिसरात दीड ते दोन तास कोंबिंग ऑपरेशन केले होते त्यानंतर अवघ्या काही ताकतच तलवार हल्ला झाल्याने पोलिसांच्या कारवाईबाबत आश्चर्य व्यक्त केले जात आहे.
सदर बाजार येथे सुन्नथ जमान मशीद असून या मशिदीचे ट्रस्टीचे अध्यक्ष व कमिटी बरखास्त केल्याच्या कारणावरून आज दुपारी एक वाजण्याच्या सुमारास अझर फकीर व त्याच्या सहकाऱ्यांनी मेहबूबखान पठाण यांच्यावर तलवारीने हल्ला केला. या हल्ल्यात मेहबूब खान यांच्या डोक्याला गंभीर दुखापत झाली आहे. त्यांना सोडवण्यास गेलेल्या नासर पठाण हेही गंभीर जखमी झाले आहेत. दोघांना सीपीआर हॉस्पिटलमध्ये उपचारास दाखल करण्यात आले आहे. घटनास्थळी शहर पोलिस उप अधीक्षक अजित टिके यांच्यासह शाहूपुरी पोलीस ठाण्याच्या अधिकाऱ्यांनी भेट दिली. या घटनेने परिसरात तणाव निर्माण झाला असून पोलिसांनी कडक बंदोबस्त ठेवला आहे.