महाराष्ट्र न्यूज वन प्रतिनिधी कोल्हापूर : 

 कोल्हापूर लोकसभा मतदारसंघातून शाहू महाराज यांची उमेदवारी निश्चित समजली जात आहे. या पार्श्वभूमीवर संभाजीराजे छत्रपती यांनी आपल्या वडिलांसाठी मोर्चेबांधणी सुरू केलेली असून आज सोमवारी त्यांनी राधानगरी तालुक्यातील नेते पदाधिकारी यांच्या भेटी घेतल्या

गेल्या आठवड्यात संभाजीराजे यांनी चंदगड, आजरा आणि गडहिंग्लज तालुक्यातील प्रमुख राजकीय मंडळींच्या भेटी घेतल्या.

 सध्या ते राधानगरी तालुक्याच्या दोन दिवसीय दौऱ्यावर असून आज सोमवारी पहिल्या दिवशी त्यांनी स्वाभिमानी शेतकरी संघटनेचे जालंदर पाटील, गोकुळचे माजी संचालक पी. डी. धुंदरे, गोकुळचे संचालक अभिजित तायशेटे, राजू मोरे, शेकापचे संजय डकरे, बिद्री कारखान्याचे माजी उपाध्यक्ष विठ्ठलराव खोराटे, भोगावती कारखान्याचे संचालक ए. डी. पाटील, शिवसेना उद्धव ठाकरे गटाचे तालुकाध्यक्ष उत्तम पाटील यांच्या घरी भेट दिली. यावेळी संबंधित गटाच्या उपस्थित कार्यकर्त्यांना संबोधित करत असताना शाहू छत्रपती महाराज यांना निवडून आणण्यासाठी सर्वांनी प्रयत्नशील राहावे, असे आवाहन संभाजीराजे यांनी केले.

 दरम्यान, कसबा तारळे येथे आयोजित काँग्रेस पक्षाच्या मेळाव्यास उपस्थित राहून संभाजीराजे यांनी सर्व कार्यकर्त्यांना शाहू महाराजांना लोकसभेत विजयी करण्यासाठी कामाला लागण्याच्या सूचना दिल्या. 

यावेळी भोगावतीचे अध्यक्ष शिवाजीराव पाटील, हिंदुराव चौगुले, संजयसिंह पाटील, मधुकर रामाने, फत्तेसिंह सावंत, प्रवीण ढोणे, संजय पोवार आदी उपस्थित होते.