महाराष्ट्र न्यूज वन प्रतिनिधी, कोल्हापूर : .  तावडे हॉटेल ते शिवाजी पुलापर्यंतचा उड्डाणपूल इलेव्हेटेड पद्धतीने उभारण्यात येणार आहे. शहरात प्रवेश केल्यानंतर मार्केट यार्ड- कावळा नाका- मध्यवर्ती बस स्थानक- दसरा चौक अशा मार्गाने जाणाऱ्या या उड्डाणपुलाला सीपीआर चौकात वळवण्यात येणार आहे. करवीर पंचायत समितीला वळसा घालून स्मशानभूमीच्या बाजूने शिवाजी पुलाकडे रत्नागिरी राज्य मार्गाला तसेच पंचगंगा नदी घाटाच्या बाजूने लक्षतीर्थ वसाहत मार्गे गगनबावडा राज्य मार्गाला हा उड्डाणपूल जोडण्यात येणार आहे.

जिल्हाधिकारी कार्यालयात या प्रकल्पाच्या तांत्रिक आराखडयाचे सादरीकरण झाले. जिल्हाधिकारी कार्यालयात राष्ट्रीय महामार्ग प्राधिकरण आणि लोकप्रतिनिधींची बैठक  झाली. या बैठकीला व्हिडिओ कॉन्फरन्सिंगद्वारे पालकमंत्री प्रकाश आबिटकर सहभागी होते. वैद्यकीय शिक्षण मंत्री हसन मुश्रीफ, खासदार श्रीमंत शाहू छत्रपती महाराज, राज्य नियोजन मंडळाचे कार्यकारी अध्यक्ष  राजेश क्षीरसागर,आमदार अमल महाडिक, अशोकराव माने, जिल्हाधिकारी अमोल येडगे, राष्ट्रीय महामार्ग प्राधिकरणाचे प्रकल्प संचालक संजय कदम यांची प्रमुख उपस्थिती होती.

या बैठकीत, राष्ट्रीय महामार्गावरून कोल्हापूर शहरात प्रवेश करणाऱ्या बास्केट ब्रिज आणि तावडे हॉटेल ते शिवाजी पूल उड्डाणपूलसंदर्भात विस्तृत चर्चा झाली. बास्केट ब्रिजवरून कोल्हापूर शहरात थेट प्रवेश मिळणार असल्यामुळे तावडे हॉटेल येथे होणारी वाहतूक कोंडी कमी होईल. या बास्केट ब्रिजला जोडूनच तावडे हॉटेल ते शिवाजी पूल या उड्डाणपुलाची उभारणी करावी अशी सूचना आमदार अमल महाडिक यांनी केली. याच उड्डाणपुलाला मध्यवर्ती बस स्थानकापासून रेल्वे ओव्हर ब्रिज करून पाच बंगला परिसराशी जोडण्यात यावे अशी सूचना आमदार  महाडिक आणि राजेश क्षीरसागर यांनी केली.  हा उड्डाणपूल झाल्यास परीख पूलाजवळ होणारी वाहतूक कोंडी कमी होईल असे मत आमदार महाडिक यांनी व्यक्त केले. या प्रस्तावित उड्डाणपुलाच्या कामासाठी कन्सल्टंट कंपनीची निवड महापालिका प्रशासनाने करावी त्या कंपनीचे मानधन राष्ट्रीय महामार्ग प्राधिकरणाकडून दिले जाईल असे प्रकल्प संचालक संजय कदम यांनी सांगितले. लवकरच यासंबंधी निविदा प्रक्रिया सुरू करण्याच्या सूचना दिल्या.

……………………..