महाराष्ट्र न्यूज वन प्रतिनिधी, कोल्हापूर : “  तुमची वेळ आत्ताच नव्हे तर,  करवीरची जनता कधीच येऊ देणार नाही. वेळ आपली आहे अशी टॅगलाईन वापरून निवडणूक लढविणारऱ्या विरोधी उमेदवाराची वेळ जनता कधीच येऊ देणार नाही. दिवंगत आमदार पी.एन.पाटील यांना आपण जशी भरभरून साथ दिली तशीच साथ मला करवीर मतदारसंघाच्या विकासासाठी द्या.  मरेपर्यंत मी तुमची साथ सोडणार नाही हे वचन आपल्याला देतो.असे भावनिक आवाहन महाविकास आघाडीचे करवीर मतदारसंघातील उमेदवार राहुल पाटील यांनी केले. 

 सांगरुळ येथे आयोजित विराट जाहीर सभेत ते बोलत होते. अध्यक्षस्थानी शिक्षक आमदार जयंत आसगावकर होते. येथील शिवाजी चौकात गर्दीचा विक्रम मोडीत काढणारी ही सभा झाली.    राहुल पाटील म्हणाले, विरोधी उमेदवार खालच्या पातळीवर जाऊन माझ्यावर टीका करतात. दिवंगत आमदार पी. एन पाटील यांच्याबद्दल काय वाट्टेल ते बोलतात त्यांना मीसुध्दा त्यांच्याच भाषेत उत्तर देऊ शकतो. माझ्यावर  चांगले संस्कार केले आहेत त्यामुळे मी त्यांना बोलत नाही, माझे कार्यकर्तेच त्यांना याचे उत्तर देतील.
   मधुरिमराजे छत्रपती म्हणाल्या, अडचणीच्या वेळी दिवंगत आमदार पी. एन पाटील यांनी जिल्ह्यात काँग्रेस पक्ष वाचविला म्हणून आज जिल्ह्यात पक्ष टिकला. लोकसभेला शाहू महाराजांच्या विजयात त्यांचा सिंहाचा वाटा आहे त्यांना श्रद्धांजली वाहण्यासाठी राहुल पाटील यांना मोठ्या मताधिक्याने विजयी करुया.
  आमदार जयंत आसगावकर, भोगावतीचे अध्यक्ष शिवाजीराव पाटील, गोकुळचे संचालक बाळासाहेब खाडे,   बाबासाहेब देवकर, दादू कामिरे, बाजीराव देवाळकर, प्रा.टी.एल.पाटील, बाजीराव खाडे, निवास सडोलीकर, प्रकाश मुगडे, कृष्णात चाबूक यांची भाषणे झाली.  यावेळी गोकुळचे जेष्ठ संचालक विश्वास पाटील, विजय देवणे, सरपंच शीतल खाडे, पी.डी.धुंदरे, एम.आर.पाटील, अमर पाटील, निवृत्ती आबा चाबूक, शामराव सुर्यवंशी, सचिन पाटील, विष्णू पाटील, सीमा चाबूक, अर्चना खाडे, नंदकुमार पाटील, गुणाजी शेलार, ए.डी.माने, भगवान पाटील उपस्थित होते.