महाराष्ट्र न्यूज वन प्रतिनिधी, कोल्हापूर : महाराष्ट्र  राज्य मार्ग परिवहन महामंडळ, कामगार कल्याण समिती, कोल्हापूर विभाग आयोजित आंतरविभागीय क्रिकेट स्पर्धा प्राथमिक फेरी २०२४-२५  स्पर्धेचा प्रारंभ सोमवारी, दोन डिसेंबर रोजी झाला. मध्यवर्ती कार्यालय येथील मुख्य कामगार अधिकारी राजेश कोनवडेकर, कोल्हापूरचे विभाग नियंत्रक शिवराज जाधव, यंत्र अभियंता यशवंत कानतोडे, विभागीय वाहतूक अधिकारी संतोष बोगारे, कामगार अधिकारी संदीप भोसले, विभागीय सांख्यिकी अधिकारी अनिल पार्टे, विभागीय वाहतूक अधीक्षक अतुल मोरे, दीपक घारगे यांच्या प्रमुख उपस्थितीमध्ये स्पर्धेचा शुभारंभ झाला. 
  शास्त्रीनगर मैदानावर सुरू असलेल्या पहिल्या सामन्यात ठाणे विभागाने नाणेफेक जिंकून सांगली विभागास फलंदाजीस पाठवले. सांगली विभागाने वीस  षटकात सर्व गडी बाद १११ धावा केल्या. त्यामध्ये शितल कुंभार याने २२ धावा, विनायक कोळी सोळा धावा अविनाश तुपे याने तेरा धावा केल्या. ठाणे विभागातर्फे गोलंदाजीत संदेश उरणकर व भरत साळवे यांनी प्रत्येकी तीन बळी घेतले तर संजय ठोकळेने दोन बळी घेतले.
 उत्तरार्धात ठाणे विभागाचा डाव १८.५  षटकात सर्व गडी बाद ९४ धावावर आटोपला. ठाणे विभागातर्फे योगेश पाटील २२ धावा तर मनोज टोणपेने १७ धावा व योगेश आरेकर १६ धावा केल्या. सांगली विभागातर्फे गोलंदाजीत दीपक पाटील याने १६ धावात तीन तर अविनाश तुपेने १७ धावात दोन बळी घेत व संघास विजयी केले.
दुपारच्या सत्रातील सामना रायगड विभाग विरुद्ध लातूर विभाग यांच्यात होऊन रायगड विभागाने हा सामना १०९ धावांनी एकतर्फी जिंकला.रायगड संघाकडून फलंदाजी करताना ऋषिकेश अडसुळे याने ३४ धावा सतीश देशमुख यांनी २५ धावा हरेश्वर पाटीलने सोळा धावा तर अतुल म्हात्रेने १९ धावा केल्या. लातूर विभागातर्फे गोलंदाजीत सत्यवान म्हेत्रे आणि अरुण कांबळे यांनी प्रत्येकी तीन बळी तर अमोल पोळ व रफिक शेख यांनी प्रत्येकी दोन बळी घेतले. उत्तरार्धात लातूर विभागाचा डाव १२.३ षटकात अवघ्या ४३ धावात आटोपला. त्यांच्या अनिल मरेवाडने एकाकी झुंज देत १९ धावा केल्या. रायगड विभागाकडून गोलंदाजीत संकेत वेताळने तीन तर स्वप्निल पवार राजेंद्र गुरव आणि सतीश देशमुख यांनी प्रत्येकी दोन बळी घेतले 
पहिल्या सामन्यातील सामनावीर सांगलीचा कर्णधार दीपक पाटील तर   दुसऱ्या सामन्यातील सामनावीर रायगड संघाचा कर्णधार सतीश देशमुख ठरला. स्पर्धेचे नियोजन बाळासाहेब माने, आकाश सूर्यवंशी, युवराज जाधव, संदेश मराठे, प्रभुदास सोनुले, ओंकार पाटील, दिगंबर कांबळे, तेजस विचारे, सचिन मलके यांनी केले. 
 मंगळवारचे सामने पुढीलप्रमाणे :-
१) मध्यवर्ती कार्यशाळा दापोडी विरुद्ध मध्यवर्ती कार्यशाळा छत्रपती संभाजी नगर सकाळी  नऊ वाजता 
२) सोलापूर विरुद्ध जालना विभाग दुपारी दीड वाजता.