महाराष्ट्र न्यूज वन प्रतिनिधी, कोल्हापूर : अहमदनगर जिल्हा मराठा विद्या प्रसारक समाजातर्फे दिला जाणारा "छत्रपती चौथे शिवाजी महाराज राज्य साहित्य विशेष पुरस्कार २०२४" शाहू कार्याचे अभ्यासक प्राचार्य डॉ. जे. के. पवार लिखित 'राजर्षी शाहूंची वाड्मयीन स्मारके' या बृहद्ग्रंथाला प्रदान करण्यात आला.

पुरस्काराचे वितरण प्रमुख पाहुणे ९७ वे अखिल भारतीय मराठी साहित्य संमेलनाचे अध्यक्ष डॉ. रवींद्र शोभणे यांच्या हस्ते झाले. कार्यक्रमाच्या अध्यक्षस्थानी संस्थेचे अध्यक्ष रामचंद्र दरे होते. पुरस्काराचे स्वरूप सन्मानचिन्ह, मानपत्र, दहा हजार रुपये रोख रक्कम, शाल व पुष्पगुच्छ असे आहे. पुरस्काराचे वितरण अहिल्यानगर येथील न्यू आर्ट्स, कॉमर्स अँड सायन्स कॉलेज येथील राजर्षी शाहू सभागृहामध्ये झाले.
 याप्रसंगी बोलताना प्राचार्य पवार म्हणाले, ‘आजचे वैचारिक प्रदूषण थांबविण्यासाठी लेखकांना समर्थपणे भूमिका घ्यावी लागणार आहे. त्यांच्या लेखणीतून फुले, शाहू, आंबेडकर यांचे विचार पुन्हा रुजवावे लागणार आहेत. राजर्षी शाहू महाराजांच्या शतकोत्तर सुवर्णजयंती वर्षामध्ये या ग्रंथास तिसरा साहित्य पुरस्कार प्राप्त झाल्याने विशेष आनंद आहे.’ ॲड. विश्‍वासराव आठरे-पाटील यांनी प्रास्ताविक केले. पुरस्काराच्या मानपत्राचे वाचन प्रा. गणेश भगत यांनी केले.