महाराष्ट्र न्यूज वन प्रतिनिधी, कोल्हापूर :- गोकुळ दूध संघाच्या निवडणुकीसाठी शपथ घेण्यावरून महायुतीच्या पदाधिकाऱ्यांमधील मतभिन्नता करवीर तालुक्यातील  ठरावधारकांच्या बैठकीत समोर आली. शपथ कुठे घ्यायची यावर नेत्यांमध्ये एकमत होत नसल्यामुळे संतप्त झालेल्या ठरावधारकांनी “तुमचा आमच्यावर विश्वास नाही का?, शपथ घेणारच नाही” असा पवित्रा घेत थेट बैठकीतूनच बाहेर पडणे पसंद केल्याचे वृत्त आहे.  संकल्पसिद्धी हॉलमध्ये बैठक आयोजित करण्यात आली होती. या बैठकीला महायुतीचे नेतेमंडळीसह उमेदवार उपस्थित होते. दरम्यान या बैठकीत माजी चेअरमन नावेद मुश्रीफ यांनी आपली भूमिका मांडताना ठरावधारकांची शपथ ही सौंदत्ती येथील रेणुका देवीच्या मंदिरात जाऊनच घेतली पाहिजे अशी भूमिका मांडली. तर याउलट प्रयाग चिखली येथील रघु पाटील यांनी संकल्प सिद्धी हॉलमध्येच सर्व ठरावधारकांची शपथ उरकून घ्यावी, अशी भूमिका घेतली. माजी संचालक बाळासाहेब खाडे यांनीही याला पाठिंबा देत,आमचे ठरावधारक इथेच शपथ घेतील असे ठामपणे सांगितले. दोन्ही बाजूंनी आपापल्या भूमिका ताणुन धरल्यामुळे त्या तिघांमध्ये काही काळ जोरदार वादावादी झाली. नेत्यांमधील हा वाद वाढल्याने हॉलमध्ये बैठकीच्या ठिकाणी एकच गोंधळ निर्माण झाला.वातावरण तापल्यामुळे अखेर आयोजित बैठक पूर्ण होऊ शकली नाही.