यजमान पाटाकडील तालीम मंडळ अ संघाने फुलेवाडी फुटबॉल क्रीडा मंडळावर ४-१ असा विजय मिळवत सतेज चषक फुटबॉल स्पर्धेच्या अंतिम फेरीत प्रवेश केला. सोमवारी १८ मार्च रोजी शिवाजी तरुण मंडळ आणि पाटाकडील तालीम मंडळ अ संघात अंतिम सामना खेळवला जाणार आहे.

शाहू स्टेडियमवर झालेल्या दुसऱ्या लढतीत पाटाकडील विरुद्ध फुलेवाडी संघाने पहिल्या गोलची नोंद केली. सामन्याच्या अकराव्या मिनिटाला संकेत असनेकरने गोल करत संघाला आघाडी मिळवून दिली. या गोल नंतर परतफेड करण्यासाठी पाटाकडील तालीम मंडळाचा झंझावात सुरू झाला. २६ व्या मिनिटाला अक्षय पायमलने मैदानी गोल करत सामना१-१ असा बरोबरीत आणला. मध्यंतरापुर्वी ज्यादा वेळेत आदित्य कल्लोळीने गोल करत पाटाकडील संघास २-१ अशी आघाडी मिळवून दिली.

उत्तरार्धात ४३ व्या मिनिटाला आदित्य कल्लोळीने वैयक्तिक दुसरा आणि संघाचा तिसरा गोल नोंदवला. तीन गोलच्या आघाडीमुळे फुलेवाडी संघाचा खेळ विस्कळीत झाला. त्याचा फायदा घेत ७६ व्या मिनिटाला ओमकार मोरे याने पाटाकडीलचा चौथा गोल नोंदवला. तीन गोलची घसघशीत आघाडी कायम टिकवत पाटाकडीलने सामना जिंकून अंतिम फेरीत प्रवेश केला.

पाटाकडीलच्या आदित्य कल्लोळीची सामनावीर तर फुलेवाडीच्या संकेत येसनेकर याची लढवय्या खेळाडू म्हणून निवड झाली.