महाराष्ट्र न्यूज वन प्रतिनिधी, कोल्हापूर -: विविध क्षेत्रातील उल्लेखनीय कार्याबद्दल केएलई सोसायटीचे कार्याध्यक्ष डॉ. प्रभाकर कोरे यांना यंदाचा, ‘कै. डॉ. एस.एस. घाळी समाजभूषण पुरस्कार’ जाहीर झाला आहे. २४ ऑगस्ट २०२६ रोजी दुपारी तीन वाजता निडसोशीचे जगद्गुरु पंचम डॉ. शिवलिंगेश्वर महास्वामी यांच्या हस्ते पुरस्कार वितरण होणार आहे. २५ हजार रुपये रोख, सन्मानचिन्ह, व मानपत्र असे पुरस्काराचे स्वरुप आहे. पुरस्काराचे यंदाचे २९ वे वर्ष आहे. विद्या प्रसारक मंडळ या संस्थेचे अध्यक्ष डॉ. सतीश घाळी यांनी पुरस्काराविषयी माहिती दिली.

गडहिंग्लज येथील माजी आमदार तथा विद्या प्रसारक मंडळाचे संस्थापक अध्यक्ष कै. डॉ. एस. एस. घाळी यांच्या स्मृतिदिनी संस्थेतर्फे दरवर्षी हा पुरस्कार दिला जातो. यंदा, या पुरस्कारांनी डॉ. कोरे यांना सन्मानित करण्यात येणार आहे. कोरे यांना भारत सरकारने ‘पद्मश्री’ पुरस्कारांनी गौरविल आहे. बेळगाव जिल्ह्यात त्यांनी शिक्षण व आरोग्य क्षेत्रात भरीव काम केले आहे. तीन वेळा राज्यसभा खासदार, एकदा कर्नाटक विधान परिषद आमदार होते. त्यांच्या आतापर्यंतच्या कामाचा गौरव म्हणून घाळी समाजभूषण पुरस्कार प्रदान करण्यात येणार आहे असे डॉ. सतीश घाळी यांनी सांगितले. संस्थेचे सहसचिव गजेंद्र बंदी यांनी, ‘कै.डॉ. घाळी यांच्या स्मृतिदिनानिमित्त तीन दिवस होणाऱ्या कार्यक्रमांची माहिती दिली. प्रा. महेश कदम यांनी वक्तृत्व स्पर्धेचा आढावा घेतला. याप्रसंगी संस्थेचे उपाध्यक्ष अरविंद कित्तूरकर, संचालक डॉ. विकास पाटील, महेश घाळी, किशोर हंजी, प्रा. सुभाष कोरे, प्रा. शिवाजी पाटील आदी उपस्थित होते.