महाराष्ट्र न्यूज वन प्रतिनिधी  : ग्रामीण महिलांच्या उत्पादनांना बाजारपेठ उपलब्ध करून देत महिला उद्योजकतेला प्रोत्साहन देण्यासाठी महाराष्ट्र राज्य ग्रामीण जीवनोन्नती अभियान (उमेद) अंतर्गत आयोजित ‘दिवाळी महोत्सव २०२६’ चे आयोजन दोन ते सहा नोव्हेंबर २०२६ या कालावधीत केले आहे. जिल्हा परिषदेच्या अध्यक्षा शिल्पा शशिकांत खोत यांच्या हस्ते सोमवारी या महोत्सवाचे उद्घाटन झाले. या महोत्सवात एकूण ३२ स्वयंसहायता महिला बचत गट सहभागी झाले आहेत. या महोत्सवामध्ये उमेद अभियानांतर्गत कार्यरत महिला बचत गटांनी तयार केलेले आकाशकंदील, पणत्या, आकर्षक रांगोळ्या, दिवाळी फराळाचे विविध पदार्थ, शोभेच्या वस्तू तसेच इतर हस्तकला व गृहउपयोगी वस्तूंचे प्रदर्शन आणि विक्री करण्यात येत आहे.उद्घाटनप्रसंगी जिल्हा परिषदेच्या मुख्य कार्यकारी अधिकारी डॉ. जॅसमिन, उपाध्यक्ष तानाजी पाटील, बांधकाम सभापती  सारिका नांदेकर, महिला व बालकल्याण सभापती विद्या पाटील, गटनेते सुधीर देसाई, जिल्हा परिषद सदस्य संग्राम कुपेकर व शिरीष देसाई, अतिरिक्त मुख्य कार्यकारी अधिकारी संतोष जोशी, उपमुख्य कार्यकारी अधिकारी ओमप्रकाश यादव तसेच जिल्हा अभियान व्यवस्थापन कक्षातील अधिकारी व कर्मचारी उपस्थित होते.