महाराष्ट्र न्यूज वन प्रतिनिधी, कोल्हापूर : अलिशान गाडया आणि फॅन्सी नंबर…ही काही नगरसेवकांची ओळख बनली आहे. विशिष्ट नंबरची गाडी दिसली की संबंधित नगरसेवक महापालिका चौकात आहेत याची खात्री पटते. नेहमी अशा गाडयांनी गजबजणारा महापालिकेतील महर्षी विठठल रामजी शिंदे चौकात सोमवारी, १८ मे २०२६ रोजी वेगळेच चित्र होते. चारचाकी वाहन बाजूला सारत काही नगरसेवक चालत महापालिकेत पोहोचले. डोक्यावर हेल्मेट परिधान करत  इलेक्ट्रिक बाईकवर स्वार होत काहींची महापालिकेत इंन्ट्री झाली…तर कोण सायकलवरुन महापालिका गाठली. काही नगरसेवकांनी केएमटीतून प्रवास केला.

 निमित्त होतं…इंधन बचतीच्या उपक्रमाचे. पंतप्रधान नरेंद्र मोदी यांनी इंधन बचतीचे आवाहन केले आहे. त्या आवाहनाला प्रतिसाद देत महापौर रुपाराणी निकम यांनी, सोमवारी, पेट्रोल-बचतीसाठी महापालिकेतील सगळया नगरसेवकांना, अधिकारी व कर्मचाऱ्यांना ई बाइक, सार्वजिनक वाहतूक व्यवस्थेतंर्गत केएमटी बसेसचा वापर करण्याचे आवाहन केले होते. महापालिकेची सर्वसाधारण सभा ११.३० वाजता होती. या सभेसाठी येताना बहुसंख्य नगरसेवकांनी इलेक्ट्रिक बाईकचा वापर केला. महापौर निकम, नगरसेविका माधुरी व्हटकर, रेखा उगवे या इलेक्ट्रिक बाईकवरुन महापालिकेत पोहोचल्या. उपमहापौर अक्षय जरग हे दुचाकीवरुन आले.

 काही नगरसेवकांनी केएमटी बसमधून प्रवास केला. महापालिकेत ते चालत आले. विरोधी पक्षनेते राजेश लाटकर, विनायक फाळके, सुभाष बुचडे हे महापालिकेत चालत आले. नगरसेवक संजय मोहिते यांनी सायकलवरुन महापालिका गाठली. स्थायी समिती सभापती विशाल शिराळे, महिला व बालकल्याण समिती सभापती दीपा ठाणेकर,सभागृह नेते मुरलीधर जाधव, काँग्रेसचे गटनेते इंद्रजीत बोंद्रे, राष्ट्रवादीचे गटनेते आदिल फरास, नगरसेवक आशकिन आजरेकर, नगरसेविका सृष्टी जाधव, नगरसेविका डॉ. नेहा तेंडुलकर नगरसेविका प्रतिज्ञा उत्तुरे यांनी इलेक्ट्रिक बाइक चालवत महापालिकेपर्यंत प्रवास केला. महापालिकेचे अधिकारी, कर्मचारीही इंधन बचतीच्या उपक्रमात सहभागी झाले. आयुक्त राजेंद्र भारुड, अतिरिक्त आयुक्त् रविकांत आडसूळ हे इलेक्ट्रक वाहनातून महापालिकेत दाखल झाले. अन्य अधिकाऱ्यांनी या उपक्रमात भाग घेतला. पेट्रोल व डिझेल बचतीसाठी पर्यावरणूरक वाहतुकीचा अवलंब केला.