महाराष्ट्र न्यूज वन प्रतिनिधी, कोल्हापूर : वाढती महागाई, इंधनाचे चढे दर, पंतप्रधान नरेंद्र मोदी यांचे परदेश दौरे या साऱ्या पार्श्वभूमीवर शिवसेना ठाकरे पक्षाच्यावतीने कोल्हापुरात विडंबनात्मक आंदोलन करण्यात आले. ‘सोने-चांदी दुकानांना कुलूप लावा, पेट्रोल-डिझेल दर वाढले त्यांचे स्वागत करा’असे फलक हाती घेत शिवसेनेच्या कार्यकर्त्यांनी रोष व्यक्त केला. बिंदू चौक येथे आंदोलन झाले.

  शिवसेना शहर प्रमुख मंजित माने यांच्या नियोजनातून आंदोलन झाले. ‘ कोल्हापुरातील नागरिकांनी काटकसर करण्यासाठी, लग्न, बारसे,स्वागत समारंभ, मुंज,जावळ,वास्तुशांती, इत्यादी कार्यक्रमावर खर्च करू नये.  पेट्रोल-डिझेलचे दर वाढले तरी कोणी यावर आंदोलन करू नये, उलट या दरवाढीचे आणि मोदींचे पुष्पहार घालून स्वागत करावे, याबरोबर सोन्या -चांदीच्या दुकानांना कायमचे कुलूप घालावे, कोल्हापूर जिल्ह्यात एक वर्षाकरिता जमावबंदी आदेश करावा, व या आदेशाचा भंग करून सोने खरेदी करणाऱ्यांवर गुन्हा दाखल करावा, पेट्रोल पंपावर अर्धा लिटर पेट्रोलच्यावर पेट्रोल देऊ नये, व हे सगळे आदेश जिल्हाधिकाऱ्यांनी प्रसिद्ध करावे,’ अशा उपहासात्मक, विडंबनात्मक  पद्धतीचे निवेदन शिवसेनेने प्रसिद्ध केले.

यावेळी उपस्थित शिवसेना सहसंपर्क प्रमुख विजय देवणे, शहर प्रमुख माने, विराज पाटील,राजू यादव,अक्षय घाडगे अभिषेक दाभाडे अक्षय मोरे, सानिका दामूगडे, तृप्ती विभूते प्रिया माने, रमेश वरोटे सदाशिवराव पवार, महादेव सुतार, अभिषेक दाभाडे, जयवंत वडगावकर शुभम पाटील, ऋषिकेश जोशी, प्रथमेश देशिंगे, राजवर्धन झांबरे,गणेश भोसले आदींचा सहभाग होता.