महाराष्ट्र न्यूज वन प्रतिनिधी, कोल्हापूर : कसबा बावडा येथे ड्रेनेज पाइपलाइनचे काम न करता तब्बल ८५ लाख रुपये बिल ठेकेदाराने उचलल्याचा आरोप माजी नगरसेवक व शिवसेनेचे जिल्हा समन्वयक सत्यजीत कदम यांनी केला. कदम यांच्या आरोपाने महापालिका प्रशासन यंत्रणा हडबडली आहे. महापालिकेच्या प्रशासक के. मंजुलक्ष्मी यांनी या प्रकाराची चौकशी करण्याचे आदेश दिले. अतिरिक्त आयुक्त रविकांत आडसूळ यांनी  या प्रकरणी तत्कालिन शहर अभियंता नेत्रदीप सरनोबत, तत्कालिन उपशहर अभियंता रमेश कांबळे आणि कनिष्ठ अभियंता प्रज्ञा गायकवाड यांना नोटीस काढली आहे. शिवाय या विषयांशी संबंधित कागदपत्रे जप्त केली आहेत.

माजी नगरसेवक कदम यांनी हा विषय समोर आणला. कसबा बावडा येथील जाधव घर ते बडबडे मळा दरम्यान दोन कोटी ४२ लाखांचे ड्रेनेज पाइपलाइन कामासाठी ठेकेदार प्रसाद वराळे यांची ऑगस्ट २०२१ मध्ये नियुक्ती झाली होती. आतापर्यत या कामासाठी चार बिले दिली आहेत.  साठ टक्के काम शिल्लक असताना ठेकेदाराने पाचचे खोटे बिल तयार करुन शेवटचे ८५ लाख रुपयाचे बिल उचलले. खोटा एमबीए (मोजमाप पुस्तिका), अधिकाऱ्यांच्या खोटया सह्या करुन ठेकेदाराने बिल तयार करुन रक्कम उचलली. कदम यांनी हा सारा प्रकार समोर आणत चौकशीची मागणी केली आहे.

 माजी नगरसेवक कदम यांनी, ‘या फसवणुकीमागील ‘आका’ कोण याचा शोध घेतला पाहिजे. ‘आका’चा शोध घेतल्याशिवाय ठेकेदार इतका मोठा घोटाळा करू शकणार नाही. शिवाय ठेकेदार व अधिकाऱ्यांची चौकशी करुन त्यांना निलंबित करावे.’अशी मागणी केली आहे. ठेकेदार  वराळे यांनी खोटया सह्या करुन बिल उचलल्याची कबुली दिली आहे. दरम्यान बिल मंजुरीच्या प्रक्रियेत खोटया सह्यांची, मोजमापाची शहानिशा कशी काय झाली नाही ? महापालिकेची फसवणूक होत असतानाही एकाही अधिकाऱ्यांच्या निदर्शनास ही बाब कशी आली ? असा सवाल आता उपस्थित होत आहे. अतिरिक्त आयुक्त आडसूळ यांनी तिघा अधिकाऱ्यांना नोटीस काढली आहे. या प्रकाराची चौकशी करुन ते अहवाल प्रशासकांना सादर करणार आहेत.