महाराष्ट्र न्यूज वन प्रतिनिधी कोल्हापूर  : कोल्हापूर महानगरपालिका निवडणुकीमध्ये काँग्रेस पक्षांनी जोरदार कामगिरी केली. आमदार सतेज पाटील यांच्या नेतृत्वाखाली काँग्रेसचे चौतीस आणि शिवसेना ठाकरे गटाचे एक असे 35 नगरसेवक महाविकास आघाडीचे निवडून आले आहेत. आमदार सतेज पाटील यांनी वाघासारखी लढत दिली. महाराष्ट्राच्या राजकारणातील ते नवीन वाघ आहेत. त्यांच्यासोबत जे होते ते सुद्धा वाघच आहेत. " असे कौतुकोदगार कोल्हापूरचे खासदार शाहू महाराजांनी काढले.
कोल्हापूर महापालिका निवडणुकीत काँग्रेस पक्षातर्फे निवडून आलेल्या नूतन नगरसेवकांना सत्कार मंगळवारी 20 जानेवारी 2026 सायंकाळी काँग्रेस कमिटीत झाला. आमदार सतेज पाटील, आमदार जयंत आसगावकर, माजी आमदार मालोजीराजे छत्रपती,  माजी आमदार ऋतुराज पाटील, शहराध्यक्ष सचिन चव्हाण, काँग्रेसचे पदाधिकारी बाळासाहेब सरनाईक, आनंद माने, सूर्यकांत पाटील बुद्धिहाळकर, माजी नगरसेविका भारती पोवार, नगरसेवक  राजू लाटकर, भरत रसाळे, तौफिक मुलाणी, विनायक घोरपडे आदींच्या उपस्थितीमध्ये हा कार्यक्रम झाला. याप्रसंगी बोलताना शाहू महाराजांनी सतेज पाटील यांच्या नेतृत्वाचे कौतुक केले. कोल्हापूर महानगरपालिकेत काँग्रेस आणि शिवसेना ठाकरे गटाचे  35 नगरसेवक निवडून आले आहेत हे निश्चितच मोठी कामगिरी आहे. या नगरसेवकांनी सभागृहात कोल्हापूरच्या शहराच्या विकासाच्या अनुषंगाने चोख कामगिरी पार पाडावी. लोकांत विश्वास निर्माण करावा की काँग्रेसमुळे शहराचा विकास होऊ शकतो. याप्रसंगी आमदार जयंत आसगावकर यांनी  आमदार पाटील यांच्या कामगिरीचे कौतुक केले. महायुतीचे सगळे नेते मंडळी एका बाजूला आणि आमदार पाटील एका बाजूला होते. आमदार पाटील यांनी अतिशय नेटाने ही निवडणूक लढवली. माजी आमदार मालोजीराजे छत्रपती यांनी आमदार सतेज पाटील यांना उद्देशून ते वाघासारखे लढले असे उद्गार काढले. माजी आमदार ऋतुराज पाटील म्हणाले, खासदार शाहू महाराज व आमदार सतेज पाटील यांच्या नेतृत्वाखाली काँग्रेसने अतिशय ताकतीने ही महापालिका निवडणूक लढवली आणि जोरदार कामगिरी केली. प्रचारापासून जाहीरनाम्यापर्यंत अतिशय उत्तम पद्धतीने साऱ्यांनी काम केले.