महाराष्ट्र न्यूज वन प्रतिनिधी : भूमिपुत्र शेतकरी गट, पाणी फाउंडेशन तसेच शाळा व्यवस्थापन समिती  सदस्य, विद्या मंदिर वाळवे खुर्द  यांच्या सहयोगातून नवीन शैक्षणिक वर्षाच्या पूर्वतयारीच्या पार्श्वभूमीवर  सामाजिक बांधिलकी, श्रमसंस्कार आणि शाळेप्रती असलेल्या जिव्हाळ्याबद्दल विद्या मंदिर वाळवे खुर्द शाळा परिसराची स्वच्छता करून उपकृत केले.
शाळा ही केवळ शिक्षण देणारी संस्था नसून ती गावाच्या संस्कृतीचे, संस्कारांचे आणि उज्ज्वल भविष्याचे केंद्रस्थान असते, या भावनेने  शाळेच्या उन्नतीसाठी सर्वांनी स्वयंस्फूर्तीने पुढाकार घेतला. शाळा परिसर स्वच्छता, पूर्वतयारी आणि परसबाग निर्मितीसाठी श्रमदान केले. हातात झाडू, खोरे, पाटी आणि स्वच्छतेची साधने घेऊन सर्वांनी प्रत्यक्ष श्रमदान करत "माझी शाळा, माझा अभिमान" ही भावना कृतीतून साकारली. विशेषतः भूमिपुत्र शेतकरी गट, शाळा व्यवस्थापन समितीचे सदस्यांचे परिश्रम आदर्शवत आहेत.
समितीचे स सदस्य  अशोक शेणवी, राजेंद्र शिपेकर यांनी स्वतः पुढाकार घेत परसबाग निर्मिती, परिसर स्वच्छता आणि पर्यावरण संवर्धनासाठी योगदान दिले. सर्वांच्या एकत्रित प्रयत्नांमुळे शाळेचा परिसर अधिक स्वच्छ, सुंदर, हिरवागार बनला. विद्यार्थ्यांसाठी आरोग्यदायी व आनंददायी शैक्षणिक वातावरण निर्माण झाले आहे.