महाराष्ट्र न्यूज वन प्रतिनिधी, कोल्हापूर  : कोल्हापूर जिल्हा शैक्षणिक व्यासपीठ कोल्हापूर व जिल्हा माध्यमिक व उच्च माध्यमिक शाळा मुख्याध्यापक संघ, कोल्हापूर यांच्या वतीने कोल्हापूर विभागाच्या शिक्षण उपसंचालक सुभद्रा कोळेकर व माध्यमिक शिक्षणाधिकारी सुवर्णा सावंत यांना राज्यातील शाळांची पटपडताळणी पुढे ढकलण्याबाबत लेखी निवेदन देण्यात आले.

शिक्षक आमदार जयंत आसगावकर, शैक्षणिक व्यासपीठ अध्यक्ष एस. डी. लाड, शिक्षक नेते दादासाहेब लाड,मुख्याध्यापक संघ चेअरमन राहूल पवार,सचिव आर. वाय. पाटील, उपाध्यक्ष रवींद्र मोरे, सुधाकर निर्मळे,श्रीकांत पाटील, एम. जी. पाटील, संदीप पाथरे, एस. के. पाटील यांच्या शिष्टमंडळाने निवेदन दिले. यामध्ये राज्यातील शाळांची पटपडताळणी  ११, १५ व २२ एप्रिल रोजी पॅट परीक्षेच्या दरम्यान आयोजित केलेली आहे. तसेच त्या दिवशी इयत्ता ९ वी व इयत्ता ११ वी च्या विशिष्ट विषयांच्या परीक्षा घेण्याबाबतही सूचना आहेत. परंतु अनेक शाळांनी यापूर्वीच आपल्या स्तरावर इयत्ता ९ वी व इयत्ता ११ वी च्या परीक्षांचे वेळापत्रक निश्चित करून विद्यार्थ्यांना दिले आहे.

 काही शाळांमध्ये या वर्गाच्या परीक्षा १ ते १० एप्रिल दरम्यान पूर्ण करून, त्यानंतर इयत्ता १० वी व इयत्ता १२ वी च्या विद्यार्थ्यांसाठी जादा तास सुरू करण्याचे नियोजन केलेले आहे.  अशा परिस्थितीत सध्याच्या नियोजनात तातडीने बदल करणे शाळांसाठी अत्यंत कठीण आहे.तसेच शैक्षणिक वर्षाच्या शेवटी पटपडताळणी करणेही व्यवहार्य व सोयीचे नाही. पटपडताळणी पुढील शैक्षणिक वर्षात सप्टेंबर महिन्यात आयोजित करावी, असे निवेदनात म्हटले आहे.