महाराष्ट्र न्यूज वन प्रतिनिधी, कोल्हापूर : कोल्हापूर जिल्हा सहकारी दूध उत्पादक संघाचे माजी अध्यक्ष व ज्येष्ठ संचालक विश्वास नारायण पाटील यांनी शिवसेना पक्षात जाहीर प्रवेश केला. उपमुख्यमंत्री तथा शिवसेना नेते एकनाथ शिंदे यांच्या प्रमुख उपस्थितीत त्यांच्या पक्ष प्रवेशाचा कार्यक्रम झाला. आगामी जिल्हा परिषद निवडणुकीच्या अनुषंगाने हा पक्ष प्रवेश महत्वाचा ठरत आहे. संचालक पाटील यांचे चिरंजीव व शिरोली दुमालाचे लोकनियुक्त् सरपंच सचिन पाटील हे पाडळी खुर्द जिल्हा परिषद मतदारसंघातून निवडणूक लढविणार आहेत. शिवसेना प्रवेशाने त्यांची उमेदवारी निश्चित मानली जात आहे.

ठाणे येथील उपमुख्यमंत्री शिंदे यांच्या निवासस्थानी आयोजित या प्रवेश कार्यक्रमास आमदार चंद्रदीप नरके, शिवसेनेचे वरिष्ठ पदाधिकारी, सहकार व सामाजिक क्षेत्रातील मान्यवर उपस्थित होते. यावेळी उपमुख्यमंत्री शिंदे यांनी विश्वास पाटील यांचे शिवसेना पक्षात स्वागत करून त्यांच्या सहकार क्षेत्रातील प्रदीर्घ कार्याचा गौरव केला. या पक्ष प्रवेशावेळी विश्वास पाटील यांच्यासोबत त्यांचे सुपुत्र सचिन पाटील, यशवंत बँकेचे माजी चेअरमन एकनाथ पाटील, बुद्धीराज पाटील (महे), नंदकुमार पाटील, वीरशैव बँकेचे माजी अध्यक्ष अनिल सोलापुरे, रयत संघाचे संचालक तसेच विविध सहकारी, सामाजिक व शैक्षणिक संस्थांचे पदाधिकारी व कार्यकर्त्यांनीही शिवसेना पक्षात प्रवेश केला.