महाराष्ट्र न्यूज वन प्रतिनिधी, कोल्हापूर: कोल्हापूर महानगरपालिका परवाना विभागाने २९ मार्च रोजी जाहीर प्रसिध्दीकरण करुन परवाना विभागाकडील मंजूर व्यवसाय सूचींपैकी काही व्यवसायांना २०२५-२०२६ या आर्थिक वर्षासाठी परवाना नूतनीकरण फी वाढ केली आहे. या विरोधात व्यावसायीकांची पुढील दिशा ठरविणेसाठी कोल्हापूर चेंबर ऑफ कॉमर्सच्या कार्यालयात बैठक झाली. या बैठकीत परवाना नूतनीकरण फी दरवाढीस विरोध करण्यात आला. बैठकीच्या अध्यक्षस्थानी कोल्हापूर चेंबरचे अध्यक्ष संजय शेटे होते. महापालिका व्यवसाय परवान्याबाबतीत पुढील निर्णय होईपर्यंत कोणत्याही व्यावसायिकांनी आपले परवाने नूतनीकरण करु नये असे आवाहन केले आहे.

 चेंबरचे मानद सचिव अजित कोठारी यांनी परवाना नूतनीकरण फी हे महानगरपालिकेचे उत्पन्नाचे स्त्रोत नसून जसे वाहन चालविणेसाठी वाहन चालकाला ज्याप्रकारे परवाना दिला जातो त्याप्रमाणे व्यावसायीकाला व्यवसायसाठी दिलेला परवाना असतो. दरवाढ चुकीची असून सर्वांनी संघटीतपणे लढा देऊन ही दरवाढ मागे घेण्यास महापालिकेला भाग पाडू असे सांगितले.

चेंबरचे अध्यक्ष संजय शेटे यांनी परवाना नूतनीकरणमध्ये १० टक्के वाढ केल्याचे महापालिका सांगते. पण प्रत्यक्षात ही दरवाढ १० टक्के नसून २० ते ६० टक्क्यापर्यंत वाढ केली आहे. व्यापाऱ्यांना विश्वासात न घेता ज्यांचा व्यवसाय किरकोळ आहे त्यांना घाऊक वर्गवारीत समाविष्ट केले. त्यामुळे त्यांना अग्निशमन कर लागू झाला. परवाना विभाग व अग्निशमन वेगळा करावा म्हणून अनेकवेळा मागणी करुन देखील दखल घेतली जात नाही. महापालिकेने २०२५-२०२६ साठी केलेली परवाना फी दरवाढ मागे घेतली नाही तर व्यावसायीकांनी आपले परवाना नूतनीकरण करु नये असे सांगितले.

टिंबर असोसिएशनचे लक्ष्मण पटेल यांनी टिंबर व्यवसायाला अगोदरच दोन परवाने लागत असून पुन्हा व्यवसाय परवाना नूतनीकरण का करावे असे सांगितले. हॉटेल मालक संघाचे सचिन शानबाग, रेडिमेड गारमेंट असोसिएशनचे अजित मेहता यांनी मनोगते व्यक्त केली.यावेळी चेंबरचे मानद सचिव जयेश ओसवाल, अजित कोठारी, खजिनदार राहुल नष्टे, संचालक संजय पाटील, संपत पाटील, प्रकाश केसरकर, हॉटेल मालक संघाचे अध्यक्ष उज्वल नागेशकर प्लायवूड डिलर्स असोसिएशनचे विनोद पटेल, इलेक्ट्रॉनिक्स असोसिएशनचे अनिल धडाम, केमिस्ट असोसिएशनचे दाजीबा पाटील, वाईन मर्चंटस् असोसिएशनचे शिरीषकुमार सोनवणे, फुटवेअर असोसिएशनचे राजन सातपुते, नारळ व्यापारी असोसिएशनचे अविनाश नासिपुडे, नविन पटेल, दीपक बोधे उपस्थित होते.