महाराष्ट्र न्यूज वन प्रतिनिधी, कोल्हापूर  : ‘कोल्हापुरात आंतरराष्ट्रीय क्रिकेट मैदानासाठी राज्य सरकारकडून तीस एकर जागा ९० वर्षाच्या करारान्वये मिळणार आहे. या मैदानातील करारासंबंधी मुख्यमंत्री देवेंद्र फडणवीस, उपमुख्यमंत्री एकनाथ शिंदे, सुनेत्रा पवार यांच्या उपस्थितीमध्ये कोल्हापूर जिल्हा क्रिकेट असोसिएशनची करार होणार आहे. हे मैदान तीन ते चार वर्षात उभारले जाईल.’ अशी ग्वाही कोल्हापूर जिल्हा क्रिकेट असोसिएशनचे अध्यक्ष संभाजीराजे छत्रपती यांनी दिली.

कोल्हापूर जिल्हा क्रिकेट (केडीसीए) असोसिएशनतर्फे  ५८ वा  वार्षिक वितरण समारंभ आयोजित केला होता. विविध गटातील उत्कृष्ट कामगिरी करणाऱ्या खेळाडू, प्रशिक्षक व संघाचा गौरव करण्यात आला. ताराबाई पार्क येथील धैर्यप्रसाद हॉल येथे हा कार्यक्रम झाला. याप्रसंगी बोलताना युवराज संभाजीराजे छत्रपती यांनी कोल्हापूर नजीक होणारे हे क्रिकेटचे मैदान पश्चिम महाराष्ट्र, कोकण व सीमाभागातील खेळाडूंना वरदान ठरेल. केडीसीएच्या या आंतरराष्ट्रीय क्रिकेट मैदानासाठी गेली पावणे दोन वर्षे मी अक्षरश राजकारणापासून बाजूला आहे. कोल्हापूर परिसरात होणारे हे आंतरराष्ट्रीय क्रिकेट मैदान एक स्वप्नवत प्रकल्प आहे. ते पूर्ण करण्याचे आव्हान मी स्वीकारले आहे. असोसिएशनमार्फत सरकारकडे १५ एकर जागा मागितली होती. तत्कालिन उपमुख्यमंत्री अजित पवार व पाच मुख्य सचिवांनी ३० एकर जागेचे नियोजन केले आहे. मैदानाठी आवश्यक निधी उभा करू. येत्या चार वर्षात हे मैदान उभारण्यासाठी सारे प्रयत्नशील आहेत.या मैदानावर आंतरराष्ट्रीय एकदिवसीय सामने, टी २०, कसोटी सामने होतील.मैदानाची उभारणी अद्ययावत पद्धतीने करू.’