महाराष्ट्र न्यूज वन प्रतिनिधी, कोल्हापूर  : विठू नामाचा  गजर, माऊली-माऊलीचा जयघोष आणि भक्तीगीते-अभंग सादर करत कोल्हापूर ते नंदवाळ पायी दिंडी उत्साहात निघाली. पुईखडी येथील माऊलींचा नेत्रदीपक रिंगण सोहळा डोळयांचे पारणे फेडणारा ठरला. रिंगण सोहळयाचा थाट डोळयात साठविण्यासाठी हजारो भाविकांनी गर्दी कली होती. कोल्हापूर येथील श्री ज्ञानेश्वर माऊली पालखी सोहळा समितीने आयोजन केले होते.

मिरजकर तिकटी येथील विठ्ठल मंदिरापासून पालखी दिंडी नंदवाळकडे प्रस्थान झाली. फुलांनी सजवलेला रथ, चांदीची पालखी, त्यामध्ये पादुका, ज्ञानेश्वरी, डोक्यावर तुळशी वृंदावन घेतलेल्या महिला, विठूनामाचा जयघोष अशा भक्तिमय वातावरणात ही दिंडी मिरजकर तिकटी, निवृत्ती चौक, उभा मारूती चौक, खंडोबा तालीम  येथे पोहोचली. येथे उभे रिंगण पार पडले. यानंतर  दिंडी नंदवाळच्या दिशेनं मार्गस्थ झाली. जुना वाशी नाका, क्रशर चौक, सानेगुरुजी वसाहत, आपटेनगर मार्गे ही दिंडी लवाजम्यासह पुईखडी येथे दाखल झाली. पालखी मार्गावर पुरुष-महिला, तरुण-तरुणी यांनी फुगड्या घालून सोहळ्याचा आनंद लुटला. या रस्त्यावर विविध संस्था-संघटनांच्या वतीनं भाविक भक्तांसाठी उपवासाच्या पदार्थाचे वाटप केले.

पुईखडी इथं आमदार राजेश क्षीरसागर, दिंडी प्रमुख आनदराव लाड महाराज, जिल्हाधिकारी अमोल येडगे, जिल्हा अधीक्षक योगेशकुमार गुप्ता, स्थायी समितीचे माजी सभापती शारंगधर देशमुख, वकील राजेंद्र किंकर, बाळासाहेब पवार, एम. पी. पाटील, अजित चव्हाण आदींच्या हस्ते अश्व पूजन झाले. प्रथम वारकऱ्यांचे गोल रिंगण पार पडलं. त्यानंतर अश्वांनी रिंगण सोहळा पूर्ण केला. यानंतर दिंडी नंदवाळकडे मार्गस्थ झाली. बोंद्रेनगर नरसिंह कॉलनी येथील धनगर समाजातर्फे केळी, खिचडी वाटप करण्यात आलं. मावळा न्यू नागदेवाडी यांच्यामार्फत आमदार अमल महाडिक यांनी  भाविकांना केळी वाटप केले.