महाराष्ट्र न्यूज वन प्रतिनिधी, कोल्हापूर-:  ‘ सर्व शिक्षकांनी नातीगोती शोधून काढून मला प्रचंड मतदान  देण्याचे कार्य केले. मत मला बघून न देता सर्व शिक्षकांना बघून दिले आहे. मी ६३ हजार शिक्षकांचा आमदार आहे. आता निवडणूक संपली. शिक्षकांची एकजूट हीच महत्त्वाची आहे.सर्वांची कामे केली जातील. माझी शिक्षकच जात व धर्म असेल. भ्रष्टाचार मुक्त शिक्षण व्यवस्था करण्यासाठी अग्रेसर आहे. शिक्षण क्षेत्रातील कामांच्या सोडवणुकीसाठी २४ तास उपलब्ध आहे.’अशी ग्वाही शिक्षक आमदार कौस्तुभ गावडे यांनी दिली.

स्वाभिमानी सहकार आघाडी व दादासाहेब लाड मित्र परिवार यांच्या संयुक्त विद्यमाने त्यांचा सत्कार समारंभ आयोजित केला होता. त्याप्रसंगी ते बोलत होते. हा सत्कार समारंभ मुख्याध्यापक संघाच्या विद्याभवनामध्ये झाला. मान्यवरांच्या हस्ते रोपास पाणी घालून कार्यक्रमाचा प्रारंभ झाला. आमदार गावडे म्हणाले, ‘शिक्षक नेते दादासाहेब लाड यांनी मला आमदार होण्यासाठी मोठी ताकद दिली. त्यामुळेकोल्हापूर जिल्ह्यातील शिक्षकांनी भरभरून मतदान केले. म्हणून शिक्षक आमदार होण्यात यश मिळाले आहे. साऱ्यांचे मार्गदर्शन घेऊनच पुढचे कार्य करीत  राहीन.’

कोल्हापूर जिल्हा शैक्षणिक  व्यासपीठाचे  अध्यक्ष एस. डी. लाड म्हणाले, ‘भाषा, संस्कृती, सामंजस्य त्यांना आजोबा व आईकडून  प्राप्त झाले आहे. आमदार कौस्तुभ गावडेंच्या विजयांने विधान परिषदमध्ये रेकॉर्ड झाले आहे. शिक्षकांची व संस्था चालकांची अनेक प्रलंबीत  कामे आहेत ती पूर्ण करावीत. अनेक शाळांमध्ये शिक्षक नाहीत ज्या त्या वर्षी शिक्षक भरती करण्यास प्रयत्न करावेत.२०१२ पूर्वीच्या शिक्षकांची टाईटी अट्ट रद्द करावी आदी कामी प्रयत्न करावेत.’    शिक्षक नेते दादासाहेब लाड म्हणाले, ‘शिक्षकांची अनेक कामे प्रलंबित आहेत. त्यासाठी अधिकाऱ्यांची बैठक लावून शिक्षकांच्या समस्या सोडवाव्यात हे गरजेचे आहे. शिक्षकांना शिक्षण विभागात चांगली वागणूक मिळावी. स्वामी विवेकानंद शिक्षण संस्थेने ग्रामीण भागात शिक्षण देण्याचे कार्य केले. त्याचीही तुम्हाला या निवडणूकीत मताच्या रूपाने पुण्याई मिळाली. कमी वयात आपल्याला शिक्षकांच्या प्रश्नांची जाण प्राप्त झाली आहे.’