महाराष्ट्र न्यूज वन प्रतिनिधी, कोल्हापू : शिवाजी विद्यापीठाच्या कुलगुरुपदासाठी प्राप्त ११५ अर्जांचे शॉर्टलिस्ट तयार करण्यात आले आहेत. कुलगुरू शोध व निवड समितीने शॉर्टलिस्ट केल्यानंतर  २५ जणांची नावे मुलाखतीसाठी निश्चित केली आहेत. येत्या तीन व चार एप्रिल रोजी मुंबई येथे त्यांच्या मुलाखती होतील. या मुलाखतीच्या प्रक्रियेतून पाच उमेदवारांची नावे कुलगुरुपदासाठी कुलपती कार्यालयाकडे सादर होतील. कुलपतींमार्फत त्या पाच जण उमेदवारांतून एका उमेदवाराची कुलगुरू म्हणून निवड होते.

तत्कालिन कुलगुरू डी. टी. शिर्के शिर्के यांचा कुलगुरुपदाचा कार्यकाल सहा ऑक्टोबर २०२५ रोजी संपला. सध्या विद्यापीठाच्या कुलगुरुपदाचा अतिरिक्त कार्यभार डॉ. सुरेश गोसावी यांच्याकडे तर प्रकुलगुरुपदी डॉ. ज्योती जाधव आहेत. दरम्यान कुलगुरू शोध समितीने कुलगुरुपदासाठी इच्छुकांकडून अर्ज मागविले होते. २३ डिसेंबर २०२५ ते २७ जानेवारी २०२६ या अर्ज दाखल करण्याच्या मुदतीत ११५ जणांनी अर्ज दाखल केले. फेब्रुवारी महिन्यात त्या अर्जांची छाननी झाली. त्यातून समितीने २५ उमेदवारांची नावे मुलाखतीसाठी शॉर्टलिस्ट केली आहेत. यामध्ये मुंबईतील डॉ. होमी भाभा राज्य विद्यापीठाचे कुलगुरू डॉ. आर. के. कामत, शिवाजी विद्यापीठाच्या प्रकुलगुरू डॉ. ज्योती जाधव, माजी प्रकुलगुरू डॉ. पी.एस. पाटील, रसायनशास्त्र विभागाचे प्रमुख डॉ. एस. एस. चव्हाण, पदार्थ विज्ञान विभागप्रमुख डॉ. आर. जी. सोनकवडे, वाणिज्य व व्यवस्थापन विभागाचे डॉ. श्रीकृष्ण महाजन, एसएनडीटी विद्यापीठाचे कुलसचिव विलास नांदवडेकर आदींचा समावेश आहे.