कोल्हापूर
येथील शाहू स्टेडियमच्या हिरवळीवर सुरू असलेल्या अटल चषक फुटबॉल स्पर्धेत शिवाजी तरुण मंडळाने फुलेवाडी फुटबॉल क्रीडा मंडळावर २-१ असा विजय मिळवत उपांत्य फेरीत प्रवेश केला. तटाकडील तालीम मंडळ आयोजित ही स्पर्धा माजी पंतप्रधान स्वर्गीय अटलबिहारी वाजपेयी यांच्या स्मृतीप्रित्यर्थ आयोजित केली आहे.
शिवाजी आणि फुलेवाडी यांच्यातील सामन्यात पूर्वार्धात दोन्ही संघांनी आघाडीसाठी जोरदार प्रयत्न सुरू केले. २४ व्या मिनिटाला शिवाजीच्या खेळाडूला डी मध्ये फुलेवाडीच्या खेळाडूने धोकादायक रोखल्याने मुख्य पंचांनी पेनल्टी किक बहाल केली. या संधीचा फायदा घेत विशाल पाटील यांनी अचूक पेनल्टी मारत शिवाजी तरुण मंडळाला १-०अशी आघाडी मिळवून दिली. तिसाव्या मिनिटाला शिवाजीने फुलेवाडीला दुसरा धक्का दिला. त्यांच्या योगेश कदम याने फुलेवाडीचा बचाव भेदत गोल केला. मध्यंतरापर्यंत शिवाजी तरुण मंडळ २-० असा आघाडीवर होता
उत्तरार्धात गोलची परतफेड करण्यासाठी फुलेवाडीने सूत्रबद्ध चढाया केल्या पण शिवाजीच्या बचाव फळीने भक्कम बचाव केला. सामन्याच्या ८० व्या मिनिटाला शिवाजीच्या खेळाडूने चेंडू हाताळल्याने मुख्य पंचानी पेनाल्टी किक बहाल केली.यावर रोहित मंडलिकने अचूक पेनल्टी कीक मारत एक गोलने आघाडी कमी केली. पूर्ण वेळेत एक गोलची आघाडी कायम टिकवत शिवाजी संघांने २-१ असा फरकाने सामना जिंकला. शिवाजी संघांच्या योगेश कदम याची सामनावीर म्हणून तर फुलेवाडीच्या अक्षय शिंदे याची लढवय्या खेळाडू म्हणून निवड झाली.
बुधवारचा सामना
संयुक्त जुना बुधवार पेठ विरुद्ध पाटाकडील तालीम मंडळ ब, दुपारी चार वाजता.