महाराष्ट्र न्यूज वन प्रतिनिधी कोल्हापूर : सांगलीचे जिल्हाधिकारी अशोक काकडे यांची बदली झाली.त्यांच्या जागी धाराशिवे येथील जिल्हा परिषदेचे मुख्य कार्यकारी अधिकारी डॉ. मैनाक घोष यांची नियुक्ती करण्यात आली आहे. आता घोष हे सांगलीचे नूतन जिल्हाधिकारी असणार आहेत. सामान्य प्रशासन विभागाचे सहसचिव सुभाष उमराणीकर यांनी या संदर्भातील आदेश काढले आहेत. अशोक काकडे हे फेब्रुवारी 2025 पासून सांगलीचे जिल्हाधिकारी म्हणून कामकाज पाहत होते. त्यापूर्वी त्यांनी सारथीचे व्यवस्थापकी संचालक म्हणूनही काम केले आहे. दरम्यान सामान्य प्रशासन विभागाने 27 मार्च 2026 रोजी बदलीचे आदेश काढलेले आहेत. सांगलीच्या जिल्हाधिकारीपदी डॉ. घोष यांची नियुक्ती झाली आहे. घोष हे 2019 च्या आयएएस बॅचचे अधिकारी आहेत. यापूर्वी त्यांनी यवतमाळ व धाराशिव येथे जिल्हा परिषदेचे मुख्य कार्यकारी अधिकारी म्हणून काम केले आहे. ते मूळचे कलकत्ता येथील आहेत. बायोकेमिस्ट्री मधून त्यांनी कलकत्ता विद्यापीठातून  पीएचडी प्राप्त केले आहे. घोष यांची सांगलीच्या जिल्हाधिकारीपदी नियुक्ती झाल्यानंतर धाराशिव  जिल्हा परिषदेच्या मुख्य कार्यकारी अधिकारीपदी डॉ. प्रियवंदा महाडदळकर यांची नियुक्ती झाली आहे. तर काकडे यांची बदली मुंबईतील कृषी औद्योगिक विकास महामंडळाच्या व्यवस्थापकीय संचालकपदी नियुक्ती करण्यात आली. काकडे हे 2010 च्या आयएएस बॅचचे अधिकारी आहेत.