महाराष्ट्र न्यूज वन प्रतिनिधी, कोल्हापूर : कोल्हापूर जिल्हा सहकारी दूध उत्पादक संघ अर्थात गोकुळशी संलग्न १२०० प्राथमिक दूध संस्थांसंदर्भात झालेल्या तक्रारीच्या अनुषंगाने चौकशी करण्यासाठी दोन अधिकाऱ्यांची चौकशी समिती नेमली आहे. सहकारी संस्था दुग्ध पुणे विभागीय उपनिबंधकांनी, चौकशी अधिकाऱ्यांची नियुक्ती केली आहे. सहकारी संस्था दुग्ध विभाग सांगलीचे सहायक निबंधक व जिल्हा विशेष लेखा परीक्षक, सहकारी संस्था पदुम सांगली हे चौकशी अधिकारी आहेत. या अधिकाऱ्यांनी प्राप्त तक्रारीच्या अनुषंगाने चौकशी करुन लवकरात लवकर अहवाल सादर करावा असे आदेश आहेत.

श्री महादेव सहकारी दूध व्यावसायिक संस्थेचे संचालक प्रकाश बेलवाडे यांनी तीन मार्च २०२६ रोजी विभागीय उपनिबंधकाकडे तक्रार दाखल केली होती. त्यामध्ये सुमारे १२०० सहकारी दूध संस्थांची संशयास्पद व नियमबाह्य नोंदणी असल्याची तक्रार आहे. याशिवाय ३१ मार्च २०२६ रोजी केलेल्या तक्रारीत, गोकुळच्या संचालक मंडळाने नियम व कायद्याला डावलून एकूण ४२३ दूध संस्थांची सभासद म्हणून नोंदणी केली असे म्हटले आहे.या दोन्ही तक्रारीच्या अनुषंगाने चौकशी करुन चौकशी अधिकाऱ्यांनी अहवाल सादर करावा असे आदेशात म्हटले आहे.