महाराष्ट्र न्यूज वन प्रतिनिधी, कोल्हापूर : चित्रकला एक वैश्विक भाषा आहे. यातून चित्रकार मनातलं मनापासून सांगत असतो. अशाच पाच कलाकारांच्या स्वतंत्र कलादृष्टीचा अनुभव देणारे ‘द सिक्स्थ सेन्स’ हे समूह कला प्रदर्शन मुंबई येथे होत आहे. याचे उद्घाटन मंगळवारी (दि. १८ आॅगस्ट) सायंकाळी ५ वाजता काला घोडा येथील जहांगीर आर्ट गॅलरीच्या हॉलमध्ये होणार आहे. या कार्यक्रमासाठी बीएसई इन्व्हेस्टमेंट्सचे माजी व्यवस्थापकीय संचालक शंकर जाधव, आमदार रोहित पवार, कला संचालक डॉ. किशोर इंगळे आणि कला व संस्कृतीच्या समर्थक चित्रा मेटे यांच्यासह मान्यवरांची प्रमुख उपस्थिती आहे.  ‘द सिक्स्थ सेन्स’ ही संकल्पना कलाकृतीकडे केवळ दृश्य म्हणून न पाहता, तिच्यामागील अंतर्ज्ञान, भावना आणि संवेदना अनुभवण्यावर भर देते. शब्दांच्या पलीकडे जाऊन कला आणि प्रेक्षक यांच्यात निर्माण होणाºया अंतर्गत संवादाचा शोध या प्रदर्शनातून घेण्यात आला आहे. अजय दळवी (कोल्हापूर ), कविता साळुंखे (पुणे ), दीपक थोपटे (पुणे ), डॉ. तानाजी अवघडे (कराड) आणि सुरेंद्र कुडपणे पाटील (पुणे) यांच्या कलाकृती मांडल्या आहेत. पाचही कलाकारांच्या कलाप्रवासाची दिशा वेगळी असून, रंग, भावना, पोत, भूमितीय रचना, शिल्प आणि लँडस्केप यांच्या माध्यमातून त्यांनी स्वतंत्र कलाभाषा विकसित केली आहे. वेगवेगळ्या अभिव्यक्ती असूनही त्यांना जोडणारा समान धागा म्हणजे अंतर्मनातून येणारी कलाजाणीव. विविध कलादृष्टींचे एकत्रित हे प्रदर्शन दि. २४ ऑगस्टपर्यंत सकाळी ११ ते सायंकाळी ७ या वेळेत खुले राहणार आहे. या प्रदर्शनाला रसिकांनी भेट देण्याचे आवाहन आयोजकांनी केले आहे.

………………