महाराष्ट्र न्यूज वन प्रतिनिधी कोल्हापूर : कोल्हापूर लोकसभा मतदारसंघातील महायुतीचे उमेदवार प्रा.संजय मंडलिक यांच्या प्रचारार्थ कोल्हापूर शहरातील प्रचाराचा शुभारंभ रविवारी २१ एप्रिल २०२४ रोजी सकाळी दहा वाजता श्री स्वामी समर्थ मंदिर कोटीतीर्थ येथून होणार आहे. श्री स्वामी समर्थांच्या दर्शनानंतर अत्याधुनिक एल.ए.डी व्हॅन, रिक्षा आदी प्रचार वाहनांचे पूजन करून प्रचाराचा नारळ फोडण्यात येणार असल्याची माहिती राज्य नियोजन मंडळाचे कार्यकारी अध्यक्ष राजेश क्षीरसागर यांनी दिली आहे.
क्षीरसागर म्हणाले, "महायुती शिवसेनेचे उमेदवार मंडलिक यांच्या विजयाचा निर्धार समस्त शिवसैनिक आणि महायुतीच्या कार्यकर्त्यांनी केला आहे. शहरात रविवारपासून अत्याधुनिक एल.ए.डी व्हॅन, २२ ठिकाणी सभा, सुमारे २५ प्रचार फेऱ्या, ७५ हून अधिक ठिकाणी मिसळ पे चर्चा, व्यक्तिगत भेटी गाठी, मॉर्निंग वॉक भेटीगाठी, पॅम्प्लेट वाटप, पथनाट्य व वासुदेव यांच्यामार्फत प्रचाराची रणधुमाळी सुरु होणार आहे. अत्याधुनिक एल.ए.डी व्हॅनद्वारे शिवसेनाप्रमुख बाळासाहेब ठाकरे यांचे विचार, पंतप्रधान नरेंद्र मोदी, मुख्यमंत्री एकनाथ शिंदे यांचे लोकहिताचे काम, महायुतीने कोल्हापूर जिल्ह्यासाठी दिलेला निधी, शिवसेनेचे सामाजिक काम यांच्या चित्रफिती प्रसारित केल्या जाणार आहेत.
प्रचाराचा शुभारंभ झाल्यानंतर कोटीतीर्थ मंदिर - मातंग वसाहत- राजारामपुरी बस रूट - मारुती मंदिर - मेन रोड - जनता बझार अशी प्रचार फेरी काढण्यात येणार आहे. यासह कोल्हापूर दक्षिण विधानसभा मतदारसंघातील पदाधिकारी व कार्यकर्त्यांचा निर्धार मेळावा अमृतसिद्धी हॉल कळंबा येथे सायंकाळी सहा वाजता पार पडणार असल्याची माहिती क्षीरसागर यांनी दिली.