दहा हजाराची लाच घेताना सहायक फौजदार जाळ्यात
schedule20 Apr 23 person by visibility 780 categoryगुन्हे
महाराष्ट्र न्यूज वन प्रतिनिधी कोल्हापूर :
तक्रारदाराची चारचाकी मित्राकडून परत आणण्यासाठी दहा हजाराची लाच स्वीकारणाऱ्या जयसिंगपूर पोलीस ठाण्यातील सहाय्यक फौजदार सोमनाथ देवराम चळचुक (वय ४८ वर्षे, १६ नंबर गल्ली विजयमालानगर जयसिंगपूर जि. कोल्हापूर मूळ रा.बाडगी ता.पेठ जि.नाशिक ) याला लाचलुचपत प्रतिबंधक विभागाने सापळा रचून जाळ्यात पकडले
लाचलुचपत प्रतिबंधक विभागाच्या पोलिसांनी या कारवाईची माहिती दिली. या गुन्ह्यातील तक्रारदार याने फायनान्स कंपनीकडून कर्ज घेऊन चारचाकी गाडी विकत घेतली होती. त्यानंतर ती गाडी त्याने मित्राला विकली. पण मित्राने फायनान्स कंपनीच्या कर्जाचे हप्ते भरले नाही.त्यासाठी तक्रारदाराने मित्राकडे तगादा लावला. पण त्याने दुर्लक्ष केल्याने तक्रारदाराने जयसिंगपूर पोलीस ठाण्यात धाव घेत मित्राकडून परत गाडी मिळवून द्यावी यासाठी जयसिंगपूर पोलीस ठाण्यात अर्ज दिला. सहाय्यक फौजदार चुळचूक याने तक्रारदाराकडे गाडी परत आणण्यासाठी पंधरा हजार रुपयांची लाच मागितली. त्यानंतर तक्रारदाराने लाचलुचपत प्रतिबंधक विभागाकडे तक्रार केली. त्याच्या तक्रारीची पडताळणी केली असता सहाय्यक फौजदार चुळचूक याने तडजोड करून पंधरा हजारा ऐवजी दहा हजार रुपये लाच मागितली. त्यानंतर पोलिसांनी त्याच्यावर विरोधात सापळा रचला. तक्रारदाराकडून दहा हजार रुपयाची लाच घेताना सहाय्यक फौजदार चुळचूक याला रंगेहात पकडण्यात आले.
लाचलुचपत प्रतिबंधक विभागाचे पोलीस उपाधीक्षक सरदार नाळे नेतृत्वाखाली पोलीस उपनिरीक्षक संजीव बंबरगेकर, सहाय्यक फौजदार प्रकाश भंडारे, पोहेकॉ विकास माने, सचिन पाटील, पो.कॉ मयूर देसाई, सुरज अपराध यांचा कारवाईत सहभाग होता.
